Upaŭ na Ziamlu saviecki kaśmičny aparat, jaki pierad tym 53 hady kružlaŭ vakoł jaje
Rasijskaja dziaržkarparacyja «Raskosmas» i astranomy z kaśmičnaj prahramy ES SST (Space Surveillance and Tracking) 10 maja paćvierdzili padzieńnie na ziamlu savieckaha aparata «Kosmas-482». Pierad tym jon 53 hady lotaŭ vakoł Ziamli.
Kaśmičny aparat «Kosmas-482». Ekspanat u muziei AT «NVA Łavačkina». Fota: Wikimedia Commons
U 1972 hodzie aparat adpravili daśledavać atmaśfieru Vieniery, ale misija pravaliłasia.
Z-za niaspraŭnaści razhonnaha błoka aparat nie pierajšoŭ na mižpłanietnuju trajektoryju i zastaŭsia na vysokaj eliptyčnaj arbicie Ziamli. Paśla naziralniki ź Ziamli vyjavili adździaleńnie ad stancyi frahmienta, jaki, vierahodna, i byŭ aparatam dla spusku. Ciapier mienavita hety elemient zvaliŭsia ŭ akijan, a asnoŭnaja častka «Kosmasu-482» syšła z arbity jašče ŭ 1981 hodzie.
Za sychodžańniem kaśmičnaha aparata ź Ziamli ciapier pilna nazirali navukoŭcy, u tym liku z dapamohaj srodkaŭ aŭtamatyzavanych sistem papiaredžańnia ab niebiaśpiečnych situacyjach u kalaziamnoj kaśmičnaj prastory.
Apoŭdni «Raskosmas» daŭ spravazdaču, što ŭ adpaviednaści z raźlikami śpiecyjalistaŭ Centralnaha navukova-daśledčaha instytuta mašynabudavańnia, jaki ŭvachodzić u skład «Raskosmasa», aparat uvajšoŭ u ščylnyja słai atmaśfiery ŭ 9:24 (pa maskoŭskim časie) u 560 km na zachad ad vostrava Siaredni Andaman i ŭpaŭ u Indyjski akijan na zachad ad stalicy Indaniezii Džakarty.
Paźniej hetuju infarmacyju paćvierdzili jeŭrapiejskija śpiecyjalisty z SST, jakija apublikavali trajektoryju padzieńnia kaśmičnaha aparata.
Niahledziačy na toje, što raźliki navukoŭcaŭ pieršapačatkova pakazvali nizkuju statystyčnuju vierahodnaść sutyknieńnia ź Ziamloj u nasielenych rajonach, u hetym pytańni da apošniaha zastavałasia niekatoraja niavyznačanaść z-za «niekantralavanaj pryrody» kaśmičnaha abjekta.
Čytajcie taksama:
Pamior aŭtar pieršaha tvora mastactva, raźmieščanaha na Miesiacy
Amazon pačała vyvodzić na arbitu internet-spadarožniki — kankurenty Starlink
Hłamurny kosmas. Džef Biezas adpraŭlaje siońnia ŭ kosmas svaju niaviestu i jašče piać žančyn
Dublorka Vasileŭskaj maryć pravieści pieršuju chirurhičnuju apieracyju ŭ kosmasie