Papa Leŭ XIV zaklikaŭ da spraviadlivaha i tryvałaha miru va Ukrainie

Novaabrany Papa źviarnuŭsia da viernikaŭ z bałkona bazyliki śviatoha Piatra.

Papa Leŭ XIV. Fota: AP Photo / Andrew Medichini

U svaim pieršym niadzielnym błasłaŭleńni z bałkona sabora śviatoha Piatra Papa Leŭ XIV zaklikaŭ da spraviadlivaha i tryvałaha miru va Ukrainie.

Taksama jon zaklikaŭ da nieadkładnaha spynieńnia ahniu ŭ Hazie z vyzvaleńniem zakładnikaŭ i bieśpieraškodnaj dastaŭkaj humanitarnaj dapamohi, piša AP.

«Nikoli bolš vajny!» — abviaściŭ Leŭ, źviartajučysia da natoŭpu na płoščy śviatoha Piatra.

Uspaminajučy 80-ju hadavinu skančeńnia Druhoj suśvietnaj vajny ŭ Jeŭropie, jon pracytavaŭ słovy papiaredniaha pantyfika Franciška, jaki nazyvaŭ sučasnyja kanflikty «Treciaj suśvietnaj vajnoj pa častkach».

Natoŭp, u jakim było šmat udzielnikaŭ arkiestraŭ, što pryjechali ŭ Rym na jubilejnyja vychodnyja, burna adreahavaŭ apładysmientami, muzykaj i ściahami z usiaho śvietu. Heta byŭ pieršy raz, kali Papa Leŭ XIV znoŭ źjaviŭsia na bałkonie paśla svajho histaryčnaha źjaŭleńnia tam u čaćvier nočču, kali jon byŭ abrany 267-m pantyfikam u historyi Kaścioła.

Ranicaj u niadzielu Leŭ adsłužyŭ pryvatnuju imšu kala mahiły śviatoha Piatra razam z kiraŭnikom svajho ordenu aŭhustyncaŭ — ajcom Alechandra Marałam Antonam. Imša prachodziła ŭ hrotach pad bazylikaj — tradycyjnym miescy pachavańnia śviatoha Piatra, jakoha ličać pieršym Papam.

Hetyja hroty, zvyčajna adkrytyja dla publiki, taksama ŭtrymlivajuć mahiły inšych pantyfikaŭ, u tym liku Bieniedykta XVI.

U subotu Leŭ pamaliŭsia kala mahiły Papy Franciška, jakaja znachodzicca ŭ bazylicy Santa-Maryja-Madžora na druhim baku horada.

Kamientary da artykuła