Na vučeńniach «Zachad-2025» buduć adpracoŭvać udary taktyčnaj jadziernaj zbrojaj i «Arešnikam»
Vučeńni «Zachad-2025» buduć nakiravany suprać zachodnich krain, uličać dośvied vajny z Ukrainaj i adpracujuć jadzierny ŭdar. Takija vysnovy možna zrabić sa słoŭ Andreja Bahadziela, namieśnika načalnika fakulteta Hienieralnaha štaba Uzbrojenych Sił Vajskovaj akademii Biełarusi.
«Hetyja vučeńni nie buduć mieć abstraktny charaktar. My mienavita ŭličym praviadzieńnie vučeńniaŭ Złučanymi Štatami i ich sajuźnikami, uličym vajskova-palityčnuju abstanoŭku, jakaja składajecca siońnia na našym napramku. Zychodziačy z hetaha, my praviadziom dadzienyja vučeńni», — raspavioŭ STB Bahadziel.
Pavodle jaho słoŭ, u hetych vučeńniach najpierš buduć adpracavanyja «samyja sučasnyja formy i sposaby prymianieńnia vojskaŭ» z ulikam viadzieńnia vajny va Ukrainie.
«Ci budzie prymianieńnie «Arešnika» i taktyčnaj jadziernaj zbroi adpracoŭvacca? Možna mierkavać, što tak», — skazaŭ jon.
Bahadziel kaža, što vajskovaje supracoŭnictva Rasii i Biełarusi viadziecca pa troch kirunkach. Adzin ź ich — navučańnie vajskoŭcaŭ Biełarusi ŭ VNU Rasii. Siońnia heta kala 300 čałaviek.
Taksama raźvivajecca vajskova-techničnaje supracoŭnictva.
«Avijacyja, bieśpiłotniki, sistemy REB — heta tradycyjnyja napramki. Jadziernaje ŭzbrajeńnie — vyklučnaje», — kaža jon.
Vučeńni «Zachad» prachodziać raz na dva hady. Apošnija adbylisia ŭ 2021 hodzie, bo ŭ 2023 hodzie vučeńni admianili praz vajnu va Ukrainie.
Sioleta ŭdzieł u vučeńniach prymuć kala 13 tysiač biełaruskich vajskoŭcaŭ, taksama aktyŭna buduć zadziejničanyja rasijskija siły.
Vučeńni zapłanavanyja na vosień i razhornucca adnačasova na palihonach dźviuch krain.