Łukašenka daručyŭ padumać pra zakupku jabłyk z-za nieŭradžaju

Alaksandr Łukašenka zajaviŭ ab nieabchodnaści zahadzia pradumać zakupku jabłykaŭ z-za nieŭradžajnaha hoda. Pra heta jon raspavioŭ padčas sustrečy sa staršyniom Bresckaha abłvykankama Piatrom Parchomčykam, paviedamlaje BiełTA.

Biełaruś adčuvaje deficyt jabłykaŭ, asabliva ŭ mižsiezońnie. Pakolki biełaruskija jabłyki horš zachoŭvajucca, z krasavika pa lipień davodzicca zakuplać impartnyja. U toj ža čas urad jašče ŭ vieraśni minułaha hoda pastaviŭ zadaču: za dva hady całkam zamiaścić impart jabłykaŭ ajčynnaj pradukcyjaj.

Ale ŭ 2025 hodzie hetym płanam nie nakanavana spraŭdzicca praz toje, što hod, jak prahnazujecca, budzie nieŭradžajnym. U suviazi z hetym Alaksandr Łukašenka daručyŭ uradu pradumać zakupku jabłykaŭ, kab «i pakłaści na zachoŭvańnie, i zakupić, moža być, u mižsiezońnie».

Pry hetym dziaržava akazvaje adčuvalnuju padtrymku vytvorcam płodaaharodninnaj pradukcyi. Naprykład, sioleta ŭrad pavialičyŭ finansavańnie dziaržprahramy «Ahrarny biźnies» prykładna na 1 młrd rubloŭ. Hetyja hrošy iduć na subsidyi i biudžetnyja tranśfierty vytvorcam sadaviny. U pryvatnaści, na budaŭnictva, rekanstrukcyju i madernizacyju pładaschoviščaŭ.

Akramia taho, dziaržpradpryjemstvy abo pradpryjemstvy z dolaj dziaržavy ŭ kapitale bolš za 50% atrymlivajuć subsidyi z respublikanskaha biudžetu na pasadku i ŭładkavańnie sadoŭ i jahadnych płantacyj. Hrošy buduć pradastaŭlacca z 2025 pa 2040 hod u pamiery staŭki refinansavańnia Nacbanka na vypłatu častki pracentaŭ za karystańnie kredytami Banka raźvićcia.

Kamientary da artykuła