Pijanier biełaruskaha IT-aŭtsorsinhu vyras u Polščy ŭ 2,5 razy

Adna z najstarejšych biełaruskich IT-kampanij SaM Solutions, jakaja ŭvachodziła ŭ «vialikuju piaciorku» aŭtsorsinhavych hulcoŭ 2000-ch, tolki niadaŭna vyjšła na polski rynak, ale ŭžo pakazvaje dobry rost, piša ŭ svaim telehram-kanale žurnalist Vadzim Siachovič.

Filijał kampanii ŭ Varšavie adkryŭsia ŭ 2022 hodzie — paźniej, čym u inšych viadomych biełaruskich kampanij: EPAM (2011), Intetics (2016), Itransition (2017) i IBA Group (2021).

U 2023 hodzie varšaŭski ofis SaM Solutions zarabiŭ 3,7 miljona złotych (kala 925 tysiač dalaraŭ), ale pracavaŭ u minus (straty bolš za 300 tysiač złotych (kala 75 tysiač dalaraŭ). A voś u 2024 hodzie kampanija vyrasła amal u 2,5 raza — da 9,2 miljona złotych (2,3 miljona dalaraŭ) vyručki — i atrymała kala 250 tysiač złotych (62 500 dalaraŭ) čystaha prybytku.

Niahledziačy na mižnarodnuju prysutnaść, u kampanii dahetul dziejničaje biełaruski ofis u PVT («SAMSolušns» — rezident Parku vysokich technałohij). Inšyja filijały raźmieščanyja ŭ Hiermanii, ZŠA, Niderłandach, Ukrainie, Litvie, na Kipry, a hałoŭny ofis — u Ryzie (Łatvija).

U Jurmale žyvie i sam zasnavalnik SaM Solutions — Andrej Bachiraŭ, jaki ŭžo daŭno adyšoŭ ad apieratyŭnaha kiravańnia i maje hramadzianstva Hiermanii. Jon vałodaje bolš jak 66% kampanii. Taksama značnyja doli (pa bolš jak 10%) naležać top-mieniedžaram Paŭłu Chaŭrankovu i Alehu Sukaču.

Kamientary da artykuła