Na čajnym hrybie zarabiŭ u Polščy pieršyja miljony restaratar z Bresta, biznes jakoha ŭłady razhramili ŭ 2020-m

Bieraściejec, jaki raniej zarablaŭ na transpartnym i restarannym biznesie, zarabiŭ pieršyja miljony złotych i na čajnym hrybie.

U 2024 hodzie vytvorčaść hetaha praduktu pad brendam Fyk pačałasia ŭ polskim Dobčynie.

Forever Young Kombucha — tak rasšyfroŭvajuć vytvorcy słova Fyk. 

Pavialičyć

Uładalnik — zarehistravanaja ŭ 2021 hodzie ŭ miastečku Katuń u Mazavieckim vajavodstvie firma Forever Young Kombucha — letaś pavialičyła vyručku amal u 2,5 razu, źviarnuŭ uvahu ŭ svaim telehram-kanale žurnalist Vadzim Siachovič.

Zhodna sa spravazdačaj Forever Young Kombucha, jaje vyručka pavialičyłasia z 1,0 młn da 2,4 młn złotych. Minuły hod staŭ pieršym, jaki Forever Young Kombucha skončyła z prybytkam. Apošni skłaŭ zvyš 400 tysiač złotych (kala 100 tysiač dalaraŭ, 300 tysiač biełaruskich rubloŭ)

U mai 2025 hoda brend Fyk staŭ adnym z partnioraŭ biełaruskaha forumu vienčurnych inviestaraŭ Angel's Band Summit 2025, jaki pravodziŭsia ŭ Varšavie.

Kirył Borachaŭ raniej byŭ viadomy jak uładalnik aŭtatranspartnaj kampanii Goa Trans.

Biźnies bieraściejca pačynaŭsia ŭ Biełarusi i Rasii ŭ siaredzinie 1990-ch, zajmieŭ klijentaŭ nakštałt «Santa Bremar», «Pieriekriostok», kandytarskaja fabryka «Pobieda», BP, Siemens, L'Oreal i inš. Adnak napačatku 2020-ch Kirył Borachaŭ vyjšaŭ z kampanij u Rasii i Biełarusi. Maskoŭskaja «Hoa-Trans» ciapier likvidujecca, bresckaja «Hoa-Trans Bieł» užo zrabiła heta ŭ kancy 2023 hoda. Pra kazachstanskuju dačku nieviadoma. Ale polskaja kampanija Goa Trans, prynamsi da 2024 hoda, hienieravała biźniesmienu asnoŭnyja abjomy vyručki. U apošnija hady jana rasła i pa vynikach 2023 hoda skłała 18,1 młn złotych. 

U Breście Kirył Borachaŭ u 2010-ja zapuskaŭ adzin ź pieršych karaokie-kłubaŭ Sola, bar Korova, kaviarniu Mario i dastaŭku ježy «Tuk-tuk». Jon taksama byŭ adnym z faŭndaraŭ nacyjanalnaj sietki ŭstanoŭ zdarovaha charčavańnia Easy Soup.

U Varšavie biełarusy taksama mohuć źbiracca ŭ jahonych ustanovach — heta Pizzeria Sole i kłub Zabawa u Centrum Praskie Koneser.

Prablemy na radzimie ŭ Kiryła Borachava ŭźnikli na fonie padziej 2020 hoda. Jahony hastra-bar Korova niekatory čas byŭ začynieny, a paźniej źmianiŭ ŭładalnika.

Jak pisali ŚMI, novym haspadarom staŭ pradprymalnik Pavieł Vakulčyk — trajuradny brat byłoha kiraŭnika KDB i ciapierašniaha pamočnika Alaksandra Łukašenki pa Bresckaj vobłaści Valeryja Vakulčyka.

U 2022 hodzie na miescy Korova zarehistravali novuju ŭstanovu — bar «Kaza». Sam Kirył Borachaŭ byŭ vymušany vyjechać ź Biełarusi. Śledčy kamitet RB 25 krasavika adkryŭ suprać Borachava zavočnuju śpiecvytvorčaść.

• 11
• 1
• 0
• 2
• 0
• 0
• 0
• 1