«U mianie pasłańnie da iranskaha naroda». Nietańjachu patłumačyŭ apieracyju «Paŭstały leŭ»

Apieracyja «Paŭstały leŭ» — tak Izrail nazvaŭ ataki na jadziernyja abjekty Irana. Premjer-ministr Bińjamin Nietańjachu pramoviŭ pramovu, u jakoj patłumačyŭ, čamu było pryniata takoje rašeńnie, i źviarnuŭsia z prymirenčym pasłańniem da iranskaha naroda, piša Bild.

Bińjamin Nietańjachu. Fota: Amir Cohen / AP

«Heta apieracyja budzie praciahvacca stolki dzion, kolki spatrebicca, kab likvidavać pahrozu. Na praciahu dziesiacihodździaŭ tyrany z Tehierana nachabna i adkryta zaklikali da źniščeńnia Izraila. Jany padmacavali svaju rytoryku hienacydu prahramaj raspracoŭki jadziernaj zbroi. Za apošnija hady Iran vyrabiŭ dastatkova ŭzbahačanaha ŭranu dla dzieviaci atamnych bombaŭ. Dzieviaci! Kali jaho nie spynić, Iran zmoža za vielmi karotki čas stvaryć atamnuju bombu. (…) Heta — jaŭnaja i niepasrednaja pahroza vyžyvańniu Izraila.

U minułym hodzie Iran vypuściŭ 300 balistyčnych rakiet pa Izraili. Kožnaja z hetych rakiet niasie tonu vybuchoŭki i pahražaje žyćciu socień ludziej. Chutka hetyja rakiety zmohuć nieści jadziernuju bojehałoŭku — i tady buduć pahražać žyćciu nie socień, a miljonaŭ ludziej. (…) Ujavicie sabie heta — ujavicie, što 10 000 ton trynaitratatału (tratyłu) abrušajucca na krainu pamieram ź Ńju-Džersi».

Nietańjachu taksama nadaŭ histaryčny kantekst tamu, što adbyvajecca — amal sto hadoŭ tamu, skazaŭ jon, pierad tvaram nacystaŭ «cełaje pakaleńnie lidaraŭ nie zdoleła svoječasova pryniać miery»:

«Jany byli rašuča nastrojeny paźbiehnuć novaj vajny luboj canoj — i atrymali samuju žudasnuju vajnu ŭsich časoŭ. Heta niazdolnaść dziejničać pryviała da Druhoj suśvietnaj vajny — samaj śmiarotnaj vajny ŭ historyi. Jana zabrała 60 miljonaŭ žyćciaŭ, u tym liku 6 miljonaŭ habrejaŭ — treć majho naroda. Paśla hetaj vajny habrejski narod i habrejskaja dziaržava paklalisia: nikoli znoŭ. Tak voś — «nikoli znoŭ» — heta ciapier. Siońnia Izrail pakazaŭ, što my zrabili vysnovy z historyi.

My raźbili CHAMAS, my źniščyli «Chiezbału». My ŭdaryli pa iranskich staŭlenikach u Siryi i Jemienie. I kali Iran letaś dvojčy naŭprost atakavaŭ nas, my nanieśli adkaznyja ŭdary pa samim Iranie.

Abaraniajučy siabie, my taksama abaraniajem inšych. My abaraniajem našych arabskich susiedziaŭ. Jany taksama paciarpieli ad kampanii chaosu i raźni, jakuju ŭčyniŭ Iran. Našy dziejańni suprać iranskaj proksi-arhanizacyi «Chiezbała» pryviali da farmavańnia novaha ŭrada ŭ Livanie i da krachu śmiarotnaha režymu Asada ŭ Siryi. U ludziej u hetych dźviuch krainach ciapier jość šaniec na inšuju budučyniu, na lepšuju budučyniu.

Heta datyčycca i chrabraha iranskaha naroda. U mianie jość pasłańnie dla vas: naša baraćba nakiravanaja nie suprać vas. Naša baraćba nakiravanaja suprać žorstkaj dyktatury, jakaja ŭžo 46 hadoŭ pryhniatała vas. Ja vieru, što dzień vašaj svabody blizki. I kali hety dzień nastanie, vialikaje siabroŭstva pamiž našymi dvuma staražytnymi narodami znoŭ raśćvicie. Ja chaču zapeŭnić cyvilizavany śviet u tym, što my nie dazvolim samamu niebiaśpiečnamu režymu ŭ śviecie atrymać samuju niebiaśpiečnuju zbroju ŭ śviecie».

Kamientary da artykuła