Namieśnika načalnika biełčyhunki Dułuba buduć sudzić pa dvuch artykułach. Jaho zatrymali za chabar, a doma znajšli jašče $3 młn
Hienieralnaja prakuratura nakiravała ŭ sud kryminalnuju spravu suprać pieršaha namieśnika Biełaruskaj čyhunki Piatra Dułuba, paviedamlaje viedamstva.
Piatra Dułuba abvinavačvajuć u tym, što jon: atrymlivaŭ chabar (artykuł 430 Kryminalnaha kodeksa), nie vykonvaŭ słužbovyja abaviazki z asabistaj vyhadaj (artykuł 425).
Pa danych abvinavačańnia, Dułub z dapamohaj pryvatnaj łahistyčnaj kampanii arhanizavaŭ za chabar tranzit vuhalu z Kazachstana ŭ Polšču praź Biełaruś, chacia heta škodziła intaresam čyhunki. Taksama jon za chabar dazvalaŭ pryvatnym kampanijam karystacca vahonami, jakija naležać BČ.
Jaho zatrymali ŭ červieni 2024 hoda kala jaho aŭtamabila. Ciapier jon zastajecca pad vartaj, a kryminalnaja sprava pieradadziena ŭ sud.
Pavodle milicyi, adzin z samych vialikich chabaraŭ u 2024 hodzie ŭ Biełarusi byŭ chabar mienavita pieršamu namieśniku načalnika Biełaruskaj čyhunki Piatru Dułubu — 370 tysiač dalaraŭ. Doma ŭ jaho znajšli $3 miljony.