Premjer-ministarku Tajłanda adchilili ad pasady z-za adnaho telefonnaha zvanka

Premjer-ministarka Tajłanda Pchetchonhtchan Čynavat była adchilenaja ad pasady paśla skandalnaha telefanavańnia da lidara Kambodžy, u jakim nazvała jaho «dziadźkam», piša Euronews.

Pchetchonhtchan Čynavat. Fota: AP Photo/Sakchai Lalit

U aŭtorak Kanstytucyjny sud Tajłanda prypyniŭ paŭnamoctvy premjerki na čas rasśledavańnia, jakoje tyčycca parušeńnia etyčnych normaŭ.

Padstavaj stała razmova pra pamiežny kanflikt z susiedniaj Kambodžaj, zapis jakoj trapiŭ u ŚMI. U im Čynavat vietliva źviartałasia da Chun Siena — staršyni Sienata Kambodžy i siabra jaje baćki Taksina Čynavata — i prasiła jaho nie słuchać tajskaha hienierała, jaki krytykavaŭ Kambodžu. Jana nazvała taho hienierała «praciŭnikam».

Razmova vyklikała abureńnie ŭ tajskim hramadstvie, asabliva siarod kansiervataraŭ i nacyjanalistaŭ. Skandał uzmacniŭsia paśla taho, jak 28 maja na miažu ŭźnikła ŭzbrojenaje sutyknieńnie, padčas jakoha zahinuŭ sałdat z Kambodžy.

Pratesty, jakija patrabavali adstaŭki Čynavat, prajšli ŭ Banhkoku. Na fonie hetych padziej sud 7 hałasami z 9 vyrašyŭ adchilić premjerku ad vykanańnia abaviazkaŭ da kančatkovaha vierdyktu. Jana maje 15 dzion, kab dać svaje tłumačeńni.

Čynavat užo publična prakamientavała situacyju, zajaviŭšy, što imknułasia praduchilić eskałacyju kanfliktu i vykazała prabačeńni za niehatyŭnyja nastupstvy ŭciečki zapisu. Jana časova pakinuła dziaržaŭnuju rezidencyju. Abaviazki kiraŭnika ŭrada ciapier vykonvaje vice-premjer Suryja Džunhrunhruanhkit.

Sudovaje rašeńnie moža stać čarhovym epizodam palityčnaj niestabilnaści ŭ Tajłandzie. Pchetchonhtchan — užo treciaja pradstaŭnica dynastyi Čynavataŭ, jakaja sutyknułasia z adchileńniem ad ułady: jaje baćka Taksin byŭ zrynuty ŭ 2006 hodzie, a ciotka Inhłak — u 2014-m.

Akramia taho, u dačynieńni da Čynavat idzie asobnaje rasśledavańnie ŭ suviazi z uciečkaj zapisu, što taksama moža stać padstavaj dla adstaŭki.

Mnohija naziralniki bačać u dziejańniach suda praciah baraćby rajalisckaha i vajskovaha isteblišmientu suprać upłyvu siamji Čynavataŭ u palitycy krainy.

Kamientary da artykuła