Ministr zamiežnych spraŭ Armienii zaklikaŭ Siarhieja Łaŭrova nie ŭmiešvacca va ŭnutranyja spravy Armienii
«Heta pravavy praces i ŭnutranaja sprava Armienii. Lepš by Łaŭrovu nie ŭmiešvacca va ŭnutranyja spravy Jerevana», — paraiŭ Ararat Mirzajan.
Kiraŭnik MZS Armienii Ararat Mirzajan zaklikaŭ ministra zamiežnych spraŭ Rasii Siarhieja Łaŭrova nie ŭmiešvacca va ŭnutranyja spravy Armienii. Pra heta Mirzajan zajaviŭ na sumiesnaj pres‑kanfierencyi z staršynioj vyšejšaha pradstaŭnictva JeC pa zamiežnych spravach i palitycy biaśpieki — vice-prezidentam Jeŭrapiejskaj kamisii Kajaj Kałas 30 červienia ŭ Jerevanie, kamientujučy słovy Łaŭrova pra situacyju ŭ Armienii, piša News.am.
Siarhiej Łaŭroŭ, vystupajučy na pres-kanfierencyi pa vynikach Savieta ministraŭ zamiežnych spraŭ ADKB u Kyrhyzstanie, daŭ acenku padziejam u Armienii, dzie razhareŭsia kanflikt urada Pašyniana z pradstaŭnikami Armianskaj apostalskaj carkvy.
«Padziei ŭ hetaj krainie — jaje ŭnutranyja spravy, ale napady na carkvu vyklikajuć zaniepakojenaść: Carkva zaŭsiody była adnoj z klučavych aporaŭ armianskaha hramadstva, i nam by vielmi nie chaciełasia, kab hetaja carkva padviarhałasia nieabhruntavanym napadam bieź jakich-niebudź surjoznych padstaŭ», — zajaviŭ Łaŭroŭ.
«Da pres‑kanfierencyi paśpieŭ aznajomicca z kamientarom lubimaha kalehi — Łaŭrova. Infarmacyja Łaŭrova niapoŭnaja i niepraŭdzivaja. Kali nie pamylajusia, jon vykarystaŭ vyraz «baraćba ŭładaŭ suprać carkvy». Infarmacyja Łaŭrova nie adpaviadaje rečaisnaści, u Armienii nie viadziecca baraćba ŭładaŭ suprać carkvy. Toje, što jon maje na ŭvazie, ŭklučaje ŭdzieł niekalkich carkoŭnikaŭ u palityčnaj dziejnaści», — zajaviŭ Mirzajan.
Jak dadaŭ Mirzajan, pa infarmacyi pravaachoŭnikaŭ, idzie havorka pra ŭdzieł u padrychtoŭcy abo inicyjavańni niezakonnaha pieravarotu.
«Heta pravavy praces i ŭnutranaja sprava Armienii. Lepš by Łaŭrovu nie ŭmiešvacca va ŭnutranyja spravy RA», — paraiŭ Mirzajan, adrasujučy anałahičny zaklik rasijskim deputatam i miedyja. Pa jaho mierkavańni, jany pavinny ź vialikaj pavahaj stavicca da suvierenitetu Armienii i nikoli bolš nie ŭmiešvacca ŭ spravy Armienii.
**
U pačatku minułaha tydnia siłaviki zatrymali archijepiskapa, lidara ruchu «Śviaščennaja baraćba» Bahrata Hałstaniana, a taksama sud zadavoliŭ chadajnictvy ab aryšcie deputata Nacyjanalnaha schodu Nahornaha Karabacha Davida Hałstaniana, pamočnika archijepiskapa Bahrata Hałstaniana Maŭsiesa Šarbaciana, błohiera Armiena Aleksaniana i pałkoŭnika zapasu Mihrana Machsudziana terminam na dva miesiac.
Śledčy kamitet Armienii 25 červienia raspaŭsiudziŭ zajavu, zhodna ź jakoj udzielniki i arhanizatary «Śviaščennaj baraćby» płanavali ździajśnieńnie terarystyčnych aktaŭ u Armienii i zamach na źviaržeńnie ŭłady.
U padrychtoŭcy, jak śćviardžajecca, udzielničali roznyja asoby, u tym liku byłyja palicejskija i vajskoŭcy. SK taksama apublikavaŭ šerah aŭdyjazapisaŭ, u apazicyi heta admaŭlajuć.
Taksama premjer Pašynian nieadnarazova rabiŭ napadki na kiraŭnictva Armianskaj apostalskaj carkvy i jaje kiraŭnika katalikosa Harehina II.
Kamientary