Ukraina prapanavała Rasii sustrecca delehacyjami na nastupnym tydni

Prezident Ukrainy Uładzimir Zialenski paviedamiŭ, što Ukraina prapanavała Rasii pravieści novuju sustreču na ŭzroŭni delehacyj užo na nastupnym tydni. Pra heta jon raskazaŭ u svaim viačernim videazvarocie 19 lipienia.

Uładzimir Zialenski. Fota: Jonathan Raa NurPhoto via Getty Images

Pavodle słoŭ Uładzimira Zialenskaha, ciapier praciahvajecca praca nad čarhovym abmienam pałonnymi, pra jaki damovilisia padčas papiarednich pieramoŭ u Stambule. Zialenski adznačyŭ, što nad hetym pracujuć śpiecyjalnyja kamandy.

Tolki ŭčora pryznačany na pasadu novy sakratar Rady nacyjanalnaj biaśpieki i abarony Ukrainy Rustem Umieraŭ, jaki byŭ raniej ministram abarony i kiraŭnikom ukrainskaj delehacyi ŭ Stambule, prapanavaŭ rasijskamu boku pravieści novuju sustreču ŭžo na nastupnym tydni.

Zialenski padkreśliŭ, što «patrebna pavialičvać pieramoŭnuju dynamiku», i zaklikaŭ Rasiju «pierastać chavacca ad rašeńniaŭ» — spynić zabojstvy, viarnuć dziaciej i praciahvać praces abmienu pałonnymi. Jon taksama zajaviŭ, što patrebnaja sustreča na ŭzroŭni kiraŭnikoŭ dziaržaŭ, kab damovicca pra sapraŭdny mir.

Raniej, 16 maja i 2 červienia, adbylisia dźvie sustrečy ŭ Stambule, ale, pavodle ŭkrainskaha boku, Rasija tolki paŭtarała svaje ultymatumy i patrabavała pieradačy joj častki ŭkrainskaj terytoryi jak umovu dla pačatku surjoznych pieramoŭ.

Paśla hetaha prezident ZŠA Donald Tramp 14 lipienia pastaviŭ Rasii ultymatum: kali na praciahu 50 dzion Maskva i Kijeŭ nie damoviacca, to suprać Rasii i jaje sajuźnikaŭ dy handlovych partnioraŭ buduć uviedzienyja novyja žorstkija sankcyi.

Kamientary da artykuła