Tramp: Rasija z pačatku hoda straciła 112 tysiač sałdat, Ukraina — 8 tysiač

Prezident ZŠA Donald Tramp zajaviŭ u sacsietcy Truth Social, što z pačatku 2025 hoda Rasija straciła bolš za 112 tysiač vajskoŭcaŭ, u toj čas jak straty Ukrainy skłali kala 8 tysiač. Pavodle jaho słoŭ, tolki ŭ lipieni zahinuła amal 20 tysiač rasijskich sałdat. 

Donald Tramp. Fota: Christopher Furlong / Getty Images

Tramp nazvaŭ hetyja straty «vialikaj kolkaściu biessensoŭnych śmierciaŭ» i adznačyŭ, što choć i Ukraina taksama maje značnyja straty, jany značna mienšyja.

Prezident ZŠA dadaŭ, što ŭ vyniku abstrełaŭ rasijskimi rakietami taksama hinuć i mirnyja žychary Ukrainy — asabliva ŭ Kijevie i inšych haradach. U kancy svajho dopisu jon iznoŭ abvinavaciŭ u pačatku vajny svajho papiarednika Džo Bajdena i zajaviŭ, što choča spynić hety kanflikt.

Pavodle inšych krynic, naprykład, brytanskaj raźviedki i analitykaŭ The Economist, ahulnyja straty Rasii z pačatku ŭvarvańnia va Ukrainu mohuć składać kala 1 miljona čałaviek — jak zahinułych, tak i paranienych. Pry hetym da 250 tysiač mahli być zabityja. Niekatoryja acenki havorać pra 400—500 tysiač biezzvarotnych strat (zabityja, źnikłyja bieź źviestak i ciažka paranienyja).

Dziaržaŭny sakratar ZŠA Marka Rubia taksama raniej zajaŭlaŭ, što tolki ŭ pieršaj pałovie 2025 hoda Rasija straciła kala 100 tysiač zahinułych. Analityki z Centra stratehičnych i mižnarodnych daśledavańniaŭ (CSIS) ličać, što Rasija straciła kala 1 miljona čałaviek, ź jakich 250 tysiač zabityja i kala 400 tysiač stali invalidami.

Kamientary da artykuła