Śpiavačka Dua Lipa atrymała hramadzianstva Kosava
«Naš honar, naš hołas u śviecie, žamčužyna Kosava — sardečna zaprašajem dadomu».
Prezidentka Kosava Vijosa Asmani i śpiavačka Dua Lipa. Fota: VjosaOsmaniPRKS / X
Suśvietna viadomaj śpiavačcy Dua Lipa vydali hramadzianstva Kosava. Cyrymonija adbyłasia 1 žniŭnia, zorku asabista vitała prezidentka Kosava Vijosa Asmani.
«Dua i Kosava zaŭsiody byli niepadzielnyja. Ad samych vialikich scen śvietu da sercaŭ miljonaŭ ludziej jana niesła našu historyju ź siłaj, honaram i vytančanaściu. Jana rassoŭvała miežy, tvaryła historyju i nahadvała śvietu, što vielič pačynajecca z uśviedamleńnia taho, chto ty i adkul rodam.
Naša padziaka biaźmiežnaja za ŭsio, što Dua zrabiła i praciahvaje rabić dla Kosava», — napisała Vijosa Asmani ŭ X.
Fota: VjosaOsmaniPRKS / X
«Naš honar, naš hołas u śviecie, žamčužyna Kosava — sardečna zaprašajem dadomu», — dadała jana.
Dua Lipa ź siamji kosaŭskich ałbancaŭ. Jany pakinuli Kosava ŭ 1990-ch i emihravali ŭ Vialikabrytaniju, dzie i naradziłasia Dua Lipa. Paźniej, kali ŭ 2008 hodzie Kosava abviaściła svaju niezaležnaść, jany ź siamjoj viarnulisia ŭ Pryšcinu, i dziaŭčyna niekalki hadoŭ tam vučyłasia, paśla čaho znoŭ źjechała ŭ Łondan rabić muzyčnuju karjeru.
U Dua Lipa jość hramadzianstva Vialikabrytanii i Ałbanii (apošniaje joj vydali ŭ 2022-m).
Śpiavačka nie raz kazała pra svaju luboŭ da Kosava. U 2016 hodzie razam z baćkam jana stvaryła fond Sunny Hill Foundation dla dapamohi žycharam Kosava.
Čytajcie taksama:
Śpiavačka Dua Lipa na ŭručeńni Brit Awards zaklikała pavysić zarobki miedsiostram — i sarvała avacyi