U Barysavie vydzialajuć bolš čym miljon dalaraŭ na «adradžeńnie jaŭrejskich tradycyj»
U Barysavie anansavali humanitarny prajekt amal na 1,2 miljona dalaraŭ pad nazvaj «Adradžeńnie jaŭrejskich tradycyj u polikulturnaj prastory Biełarusi». Adnak hety prajekt vyklikaje šmat pytańniaŭ, bo jaŭrejskaja supolnaść na siońniašni dzień u horadzie faktyčna źnikła, piša Ex-press.live.
Zakinutaja mikva ŭ Ziembinie. Fota: poshyk.info
Prajekt, raźmieščany na sajcie Barysaŭskaha rajvykankama, praduhledžvaje rekanstrukcyju mikvy (jaŭrejskaha rytualnaha basiejna) u ahraharadku Ziembin, stvareńnie muziejnaj ekspazicyi, praviadzieńnie lekcyj, sieminaraŭ i navukovych kanfierencyj.
Bolšaja častka biudžetu — $1 000 000 — pojdzie mienavita na adnaŭleńnie mikvy, jašče $100 000 — na dakumientacyju. Ale sufinansavańnie z boku miascovych struktur składaje pry hetym usiaho tolki $3 000.
Prajekt pazicyjanujecca jak kulturna-relihijnaja inicyjatyva, ale ŭźnikaje hałoŭnaje pytańnie: dla kaho heta ŭsio? U Barysavie na siońniašni dzień amal nie zastałosia jaŭrejaŭ — supolnaść była źniščanaja padčas Chałakostu i ź ciaham času całkam źnikła.
Raniej, u 2022 hodzie, išła havorka navat pra toje, kab vyklučyć Ziembinskuju mikvu sa śpisu historyka-kulturnych kaštoŭnaściaŭ, ale paźniej miascovyja ŭłady nazvali hetuju infarmacyju «čutkami». Ciapier ža toj ža samy abjekt raptam staŭ centram maštabnaha i darahoha prajekta.
Siarod inšaha płanujecca nabyć VR-akulary, multymiedyjnaje abstalavańnie i pravodzić navukovyja mierapryjemstvy. Choć, uličvajučy faktyčnuju adsutnaść supolnaści i tamu niemahčymaść vykarystańnia rytualnaj pabudovy jak sapraŭdnaha relihijnaha abjekta, usio heta vyhladaje niejak nadumana. Niekatoryja bačać u prajekcie chutčej sprobu «asvoić biudžet», čym imknieńnie da sapraŭdnaha «adradžeńnia».