Sustreča Uitkafa z Pucinym była bolš praduktyŭnaj, čym čakałasia. Tramp nieadkładna sazvaniŭsia ź Zialenskim i lidarami Jeŭropy

Prezident ZŠA Donald Tramp, pavodle infarmacyi The New York Times, hatovy na nastupnym tydni asabista sustrecca z Uładzimiram Pucinym, a paśla hetaha — pravieści sumiesnuju sustreču z tym ža Pucinym i prezidentam Ukrainy Uładzimiram Zialenskim. Pra heta vydańniu paviedamili dźvie znajomyja ź situacyjaj ananimnyja krynicy.

Uładzimir Pucin i pasłańnik prezidenta ZŠA Styŭ Uitkaf. Fota Gavriil Grigorov, Sputnik, Kremlin Pool Photo via AP

Jak śćviardžajuć krynicy The New York Times, Tramp raskazaŭ pra svaje namiery padčas telefonnaj razmovy ź jeŭrapiejskimi lidarami 6 žniŭnia. Sustrečy, zhodna z płanam, pavinny prajści tolki z udziełam Trampa, Pucina i Zialenskaha.

Jeŭrapiejskija kiraŭniki, jakija raniej sprabavali arhanizavać pieramovy pa spynieńni ahniu va Ukrainie, nibyta pahadzilisia z hetaj inicyjatyvaj Trampa.

Ci dali na heta zhodu sam Pucin i Zialenski, pakul nieviadoma. Ale Zialenski sam udzielničaŭ u toj razmovie i paźniej adznačyŭ, što «zdajecca, Rasija ciapier bolš schilnaja da pieramirja».

U razmovie, akramia Trampa i Zialenskaha, taksama ŭdzielničali premjer-ministr Vialikabrytanii Kir Starmier, fiederalny kancler Hiermanii Frydrych Mierc, prezident Finlandyi Alaksandr Stub, hienieralny sakratar NATA Mark Rute, vice-prezident ZŠA Džej Dzi Vens, dziaržsakratar ZŠA Marka Rubia i śpiecyjalny pasłańnik Trampa Styŭ Uitkaf, jaki siońnia sustrakaŭsia z Pucinym u Maskvie.

Praŭda, u svajoj publikacyi ŭ sacsietcy TruthSocial paśla hetaj razmovy Tramp zusim nie zhadvaŭ pra namier sustrecca z Pucinym i Zialenskim.

Adnačasova krynica, na jakuju spasyłajucca adnačasova NYT, Reuters i Axios, paviedamiła, što Bieły dom nie admaŭlajecca ad płana ŭvieści novyja sankcyi suprać Rasii 8 žniŭnia.

Niamieckaje vydańnie Bild, u svaju čarhu, napisała, što Donald Tramp stelefanavaŭsia z Frydrycham Miercam i skazaŭ, što sustreča Uitkafa była bolš praduktyŭnaj, čym čakałasia. Ale z kantekstu niezrazumieła, ci była heta asobnaja razmova Trampa ź Miercam, ci heta była taja samaja vyšejzhadanaja razmova, kali stelefanoŭvalisia ŭsie razam.

Kamientary da artykuła