Pucin i Tramp skončyli pieramovy. Tramp zajaviŭ, što ździełki pakul niama

Paśla pieramoŭ u Ankorydžy (Alaska) Donald Tramp i Uładzimir Pucin vystupili z abciakalnymi zajavami.

Pres-kanfierencyja Trampa i Pucina. Fota: AP Photo/Jae C. Hong

Pieramovy Trampa i Pucina ciahnulisia 2 hadziny 45 chvilin. Paśla samitu Tramp patelefanavaŭ Zialenskamu i jeŭrapiejskim lidaram.

U intervju Fox News, zapisanym da pačatku sustrečy z Pucinym, Tramp skazaŭ, što choča skončyć vajnu va Ukrainie na hetym tydni. Jon taksama zajaviŭ, što ŭ nastupnaj sustrečy buduć udzielničać jon, Pucin i Zialenski.

Padčas pres-kanfierencyi Pucin skazaŭ, što pieramovy prajšli hruntoŭna i kanstruktyŭna. I pračytaŭ karotkuju lekcyju pra Alasku.

Jon zajaviŭ, što adnoj z centralnych tem sustrečy stała vajna va Ukrainie.

«My zaŭsiody ličyli ŭkrainski narod brackim. Kab urehulavańnie było ŭstojlivym, treba likvidavać pieršapryčyny kanfliktu», — skazaŭ Pucin.

Jon dadaŭ, što Maskva raźličvaje, što ŭ jeŭrapiejskich stalicach «nie buduć čynić pieraškod i sprabavać sarvać namiečany prahres».

Fota: AP Photo/Julia Demaree Nikhinson

Tramp zajaviŭ, što ździełki pakul niama.

«U nas była vielmi praduktyŭnaja sustreča, my abmierkavali mnohija pytańni, my nie zmahli znajści poŭnaha razumieńnia, ździełki pakul niama», — skazaŭ jon.

Tramp dadaŭ, što spadziajecca ŭ chutkim časie znoŭ pabačycca z Pucinym.

«Next time in Moscow», — skazaŭ Pucin jamu pa-anhlijsku, na što Tramp adžartavaŭsia.

Paśla karotkaj pres-kanfierencyi Pucin i Tramp nie stali adkazvać na pytańni žurnalistaŭ.

Sumiesny abied prezidentaŭ admianili. Pieramovy zaviaršylisia.

Kamientary da artykuła