Biełaruskija akciory, jakija syhrali hałoŭnyja roli ŭ niamiecka-aŭstryjskim filmie, atrymali ŭznaharody na kinafiestyvali ŭ Łakarna
Sam film, jaki častkova zdymali ŭ Biełarusi, taksama adznačany žury.
Kadr ź filma «Bieły ślimak». Fota: Panama Film / Raumzeitfilm
16 žniŭnia ŭ šviejcarskim horadzie Łakarna adbyłasia cyrymonija zakryćcia i ŭručeńnia ŭznaharod adnaho z samych prestyžnych mižnarodnych kinafiestyvalaŭ. U asnoŭnym konkursie byŭ pradstaŭleny film «Bieły ślimak» — sumiesnaja praca aŭstryjska-niamieckaha režysiorskaha dueta Elzy Kriemsier i Levina Pietera. Stužka pryśviečanaja historyi kachańnia ŭ sučasnaj Biełarusi.
Film byŭ vysoka acenieny žury i atrymaŭ dźvie ŭznaharody: śpiecyjalny pryz žury (druhaja pa značnaści ŭznaharoda fiestyvalu) i pryz za akciorskuju ihru, jaki byŭ uručany vykanaŭcam hałoŭnych rolaŭ — Maryi Imbro i Michaiłu Siańkovu.
Film raspaviadaje historyju kachańnia dvuch aŭtsajdaraŭ, jakija pierakulvajuć śviety adno adnaho z noh na hałavu. Adnačasova — heta daśledavańnie adzinoty, jakoje pranizvaje sučasnaje žyćcio, i tych tonkich nitak, jakija źviazvajuć i rujnujuć čałaviečyja adnosiny, piša Reform.
Hieroi filma — maładaja madel Maša, jakaja maryć pra karjeru ŭ Kitai, i mastak i pracaŭnik morha Miša.
«Naš film — pra pierałomny momant. Ci heta adnosiny dvuch piersanažaŭ ci najnoŭšaja historyja Biełarusi: havorka idzie pra niavyrašanyja pytańni, źviernutyja ŭ jašče nie razhadanuju budučyniu», — kažuć pra svoj film režysiory.
Dla zdymačnaj hrupy, jakaja składajecca z prafiesijanałaŭ ź niekalkich krain, zdymki ŭ Biełarusi stali biesprecedentnym vopytam, jany patrabavali pastajannaj abačlivaści, kab paźbiehnuć niepažadanaj uvahi. Padrychtoŭka i sami zdymki zaniali dziesiać hadoŭ.