U Danii raskryli apieracyju ŭpłyvu ZŠA, skiravanuju na zachop Hrenłandyi

U Danii raskryli amierykanskuju «apieracyju ŭpłyvu», nakiravanuju na dałučeńnie Hrenłandyi da ZŠA. Ministr zamiežnych spraŭ Danii Łars Lokie Rasmusen vyklikaŭ najvyšejšaha amierykanskaha dypłamata ŭ krainie (ciapier heta časovy pavierany ŭ spravach ZŠA) i vykazaŭ pratest z hetaj nahody.

Stalica Hrenłandyi — Nuuk. Fota: Steffen Trumpf / picture alliance via Getty Images

Paśla prychodu Donalda Trampa da ŭłady ŭ ZŠA jon zajaviŭ, što Hrenłandyja, jakaja źjaŭlajecca paŭaŭtanomnaj terytoryjaj Danii, pavinna stać častkaj ZŠA. Jaho administracyja tajna pačała zaviazvać kantakty ź ludźmi, jakija mahli b dapamahčy ŭ hetym.

Dackija śpiecsłužby vyjavili sietku ź jak minimum troch amierykancaŭ, jakija zajmalisia «apieracyjami ŭpłyvu» ŭ Hrenłandyi, paviedamlaje dziaržaŭnaja teleradyjokampanija DR. Raniej hetyja ludzi byli blizkija da Trampa, ale pakul nieviadoma, dziejničali jany pa instrukcyjach Biełaha doma ci samastojna.

Adzin ź ich naviedaŭ Hrenłandyju, kab skłaści śpis mahčymych sajuźnikaŭ i praciŭnikaŭ płana dałučeńnia vostrava da ZŠA, a taksama prasiŭ miascovych žycharoŭ «padavać infarmacyju, jakaja mahła b vystavić Daniju ŭ drennym śviatle ŭ amierykanskich ŚMI».

Dvoje inšych pracavali nad zaviazvańniem kantaktaŭ z palitykami, biznesmienami i hramadskimi dziejačami dla realizacyi płanaŭ Trampa. Ministr zamiežnych spraŭ Danii paćvierdziŭ, što «zamiežnyja asoby» sprabujuć upłyvać na budučyniu Hrenłandyi, i nazvaŭ padobnyja sproby «nieprymalnymi».

Słužba biaśpieki i raźviedki Danii adznačaje, što Hrenłandyja ŭ ciapierašniaj situacyi stała abjektam roznych «kampanij upłyvu», nakiravanych na razład u adnosinach pamiž Danijaj i Hrenłandyjaj.

Raniej, u mai, Danija ŭžo vyklikała amierykanskaha dypłamata paśla paviedamleńnia The Wall Street Journal, što amierykanskija śpiecsłužby atrymali zadańnie šukać ludziej u Hrenłandyi, jakija mahli b sadziejničać pieradačy vostrava pad kantrol ZŠA.

Kamientary da artykuła