U Trampa «chutka zakančvajecca» ciarpieńnie, jon anansavaŭ novyja sankcyi suprać Rasii

Prezident ZŠA Donald Tramp zajaviŭ, što jaho ciarpieńnie ŭ adnosinach da Uładzimira Pucina «chutka zakančvajecca», i anansavaŭ novyja sankcyi suprać rasijskaha bankaŭskaha siektara i naftavaj haliny.

Donald Tramp. Fota: Chip Somodevilla / Getty Images

U intervju Fox News Tramp adznačyŭ:

«Ciarpieńnie, možna skazać, užo zakančvajecca i zakančvajecca chutka. My źbirajemsia ŭvieści vielmi žorstkija sankcyi suprać bankaŭ, a taksama ŭdaryć pa nafcie i ŭvieści taryfy».

Tramp nahadaŭ, što raniej užo ŭvodziŭ pavyšanyja pošliny suprać Indyi, jakaja stała najbujniejšym pakupnikom rasijskaj nafty, i pryznaŭ, što heta vyklikała napružańnie ŭ adnosinach pamiž Vašynhtonam i Ńju-Deli.

Adkazvajučy na pytańnie pra mahčymaść urehulavańnia kanfliktu va Ukrainie, Tramp zajaviŭ, što nie ŭpeŭnieny ŭ hatoŭnaści Rasii da pieramoŭ. Pry hetym jon adznačyŭ, što i Uładzimir Zialenski nie zaŭsiody demanstravaŭ hatoŭnaść da dyjałohu:

«Dla tanha patrebnyja dvoje. Kali Pucin hatovy, Zialenski nie choča. Kali Zialenski choča, Pucin admaŭlajecca. Zaraz Zialenski choča, a Pucin pad pytańniem».

Pavodle infarmacyi vydańnia Politico, jeŭrapiejskim lidaram udałosia pierakanać Trampa ŭ tym, što Pucin nie hatovy zaviaršyć vajnu, i tamu treba ŭzmacniać cisk.

Dypłamat ES adznačyŭ: «Narešcie Tramp na našym baku».

Adnak pamiž ZŠA i Jeŭrasajuzam zastajucca roznahałośsi adnosna taho, jak mienavita ŭzmacniać sankcyi.

Vašynhton prapanuje razam ź ES uvieści 100-pracentnyja taryfy suprać krain, jakija kuplajuć rasijskija enierhanośbity, i abmiežavać jak ekspart, tak i impart tavaraŭ, kab nie dapuścić pieradačy Rasii technałohij padvojnaha pryznačeńnia.

U Brusieli ž ličać, što treba kancentravacca ŭ pieršuju čarhu na sankcyjach suprać kankretnych bankaŭ i kampanij.

Akramia taho, administracyja Trampa nibyta prapanuje Jeŭropie pačać pramuju kanfiskacyju zamarožanych rasijskich reziervaŭ (kala €200 miljardaŭ ich znachodzicca ŭ ES), kab vykarystoŭvać ich nie tolki praz prybytak ad inviestycyj, ale i niepasredna dla finansavańnia dapamohi Ukrainie.

Kamientary da artykuła