«Mis Biełaruś» usio bolš nahadvaje konkurs pryhažości ŭ haremie

Minimum 9 z 24 pretendentak na karonu tak ci inakš udzielničali ŭ roznych prapahandysckich mierapryjemstvach.

Raniej časta kazali, što ŭdzielnicy konkursu «Mis Biełaruś» paśla jaho traplajuć u śvitu Łukašenki — u tak zvany «kavunovy bataljon». Faktyčna pryhažuni — adzin sa statutnych aksesuaraŭ sastarełaha palityka. Jaho frazu «žančyny — naša samaja efiektyŭnaja dypłamatyčnaja zbroja» navat nadrukavali na mierčy. U cišotkach z takim nadpisam na hrudziach sioleta źjavilisia niekatoryja z udzielnic konkursu pryhažości.

Lizavieta Łahodzič na «Mis Biełaruś 2025». Fota ź instahrama konkursu

Maładyja dziaŭčyny stvarajuć pryhožy fon, kali dyktatar hladzić niejki kancert ci sprabuje zakinuć šajbu ŭ varoty.

«Naša Niva» praanalizavała sacyjalnyja sietki pretendentak na karonu ŭ 2025 hodzie, i zaŭvažyła: u niekatorych pryhažuń los składvajecca ŭ advarotnym paradku — spačatku jany pačynajuć śviacicca na praŭładnych mierapryjemstvach, a ŭžo potym traplajuć u śpis udzielnic «Mis Biełaruś».

Darečy, takoje adbyvajecca nie ŭpieršyniu. Možna zhadać adnu z apošnich favarytak Łukašenki Uładlenu Zajcavu. Da taho, jak trapić na «Mis Biełaruś», a potym stać jaho publičnaj kampańjonkaj, jana pieryjadyčna źjaŭlałasia siarod tych dziaŭčat, jakija na aficyjnych mierapryjemstvach vynosiać čynoŭnikam kvietki ci karavaj. Cikavy fakt: pryhažuniam, jakija pa kamandzie paśmichajucca dy defilirujuć na vysokich abcasach, kažuć, što jany nie aby-čym zajmajucca, a słužać Ajčynie.

Darja Bazyleva rodam z Homiela. Dziaŭčynu na konkursie pradstaŭlali jak studentku, jakaja vučycca na psichołaha. Ale «vynosić kvietački» taksama pačała: jaje možna pabačyć na fotazdymkach, kali čynoŭniki sioleta ŭ Homieli ŭskładali kvietki 9 maja. Ab tym, što Darja nie prosta pryhnanaja studentka, a štatnaja pryhažunia, śviedčyć ahulny zdymak: jana paziruje ŭ kampanii inšych dziaŭčat, jakija apranulisia absalutna adnolkava i zrabili identyčnyja pryčoski i makijaž.

Darja Bazyleva ŭ zvyčajnym žyćci. Fota ź jaje instahrama

Darja Bazyleva (apošniaja sprava) padčas aficyjnaha mierapryjemstva

Darja Bazyleva dapamahaje ŭračysta adkryć miemaryjalnuju došku

Pra minčanku Vitaliju Žamko raspaviali, što jana, z adnaho boku, choča pracavać u advakatury, a ź inšaha — pradstaŭlać Biełaruś na mižnarodnych konkursach pryhažości. Sioleta naprykancy sakavika Vitalija vykłała storys, jak hladzieła chakiejny matč z udziełam Łukašenki.

Vitalija Žamko naviedvała matč kamandy Łukašenki suprać kamandy Mahiloŭskaj vobłaści

Minčanku Kryścinu Bielskuju pradstaŭlali jak nastaŭnicu anhlijskaj movy, jakaja maryć stać ściuardesaj. Ale ž u svaim instahramie dziaŭčyna pazicyjanuje siabie jak madel. Całkam łahična, bo dziaŭčyna aktyŭna ŭdzielničaje ŭ konkursach pryhažości.

Faktyčna Kryścina pakul idzie šlacham Uładleny Zajcavaj. Jak i jana, Kryścina źjaŭlajecca pierad vačyma Łukašenki padčas «Słavianskaha bazaru» dy na śviacie ŭ Aleksandryi.

Kryścina Bielskaja

Minčanka Kaciaryna Trykaza sioleta paśpieła atrymać karonu «Mis Minsk». Dopis, pryśviečany svajoj pieramozie, dziaŭčyna skončyła praŭładnym łozunham: «Čas abraŭ nas».

U telehram-kanale Trykaza publikavała zdymki z Savieta Respubliki: sioleta ŭ červieni Biełaruś i Azierbajdžan padpisali pahadnieńni ab supracoŭnictvie pamiž moładzievymi arhanizacyjami. Kaciaryna była adnoj z tych pryhažuń, jakija padnosiać surjoznym dziadźkam dakumienty na podpis.

Kaciaryna Trykaza. Fota ź jaje th-kanała

Jość jašče adna ŭskosnaja prykmieta, jaki moža śviedčyć pra toje, što dziaŭčyna ŭvachodzić u śpis štatnych pryhažuń — heta čorny čachoł na telefon z nadpisam «Respublika Biełaruś», załatym hierbam i čyrvona-zialonym ściaham.

Z takimi raniej užo zaśviacilisia aktyŭnyja ŭdzielnicy łukašenkaŭskich mierapryjemstvaŭ Darja Hančarevič i Jana Baranoŭskaja (jany taksama ŭ svoj čas udzielničali ŭ konkursie «Mis Biełaruś»). Darečy, taki samy čachoł ź dziaržaŭnaj simvolikaj maje i Kaciaryna Trykaza.

Kaciaryna Trykaza. Fota ź jaje th-kanała

Hanna Byčko vučycca ŭ miedycynskim VNU, płanuje stać dziciačym chirurham. Sioleta 9 maja jana ŭdzielničała ŭ łukašenkaŭskim paradzie i, miarkujučy pa jaje storys, siadzieła na adnoj ź vip-trybun.

Hanna Byčko

Stefaniju Kazłovič prezientavali jak prakurorku. Na ANT kazali, što jana choča zmahacca za «abaronu pravoŭ i svabod hramadzian, zachavańnie zakonnaści». Pryhažunia źjaŭlajecca aktyvistkaj BRSM. U jaje akaŭncie šmat fota i videa z aficyjnych mierapryjemstvaŭ.

Stefanija Kazłovič. Fota ź jaje instahrama

Stefanija hanarycca tym, što joj daručajuć vynosić kvietački i dypłomy. Sioleta paśla łukašenkaŭskaj inaŭhuracyi jana zdymała videa, jak palityku prysiahajuć na viernaść vajskoŭcy na płoščy hierba i ściaha.

Fota ź instahrama Stefanii Kazłovič

Na paradzie 9 maja Stefanija taksama była niedzie niedaloka ad Łukašenki.

Jana sfatahrafavałasia ŭ kampanii inšych pryhažuń, jakich apranuli adnolkava: čornyja kaściumy, biełyja błuzki dy bežavyja trenčy. Pryčoski taksama adnolkavyja — tradycyjnyja hulki. Takija samyja možna pabačyć i ŭ dziaŭčat, jakija ŭ pałacy Niezaležnaści prynosiać kavu dy harbatu darahim haściam Łukašenki.

Fota ź instahrama Stefanii Kazłovič. Fota zroblena na paradzie 9 maja 

Pra Lizavietu Łukšu padčas konkursu raspaviali, što dniom jana moža być na praktycy ŭ prakuratury, a ŭviečary ŭžo zaŭzieć na chakiejnym matčy. Dziaŭčynu taksama pieryjadyčna zadziejničajuć dla «padaj-pryniasi» na roznych mierapryjemstvach, a jašče pieraapranajuć u nacyjanalnyja stroi, kab sustrakać roznyja delehacyi.

Lizavieta Łukša. Fota ź jaje instahrama

Alaksandra Šapurava raniej zaśviaciłasia na «Słavianskim bazary», dzie vynosiła na scenu kvietki i dypłomy. Na tak zvany Dzień narodnaha adzinstva letaś jaje taksama paklikali.

Alaksandra Šapurava. Fota ź jaje instahrama

Alija Karotkaja ŭžo nie ŭpieršyniu ŭdzielničała ŭ «Mis Biełaruś» — minuły raz jana pretendavała na karonu hałoŭnaj pryhažuni ŭ 2023 hodzie. Ciapier u jaje instahramie možna pabačyć fota i videa z chakiejnych matčaŭ Łukašenki.

Alija Karotkaja. Tut i dalej fota ź jaje instahrama

Dziaŭčyna pachvaliłasia, što sioleta jaje zaprasili hladzieć parad z trybuny A — darečy, tam siadzieła i imaviernaja dačka Łukašenki Kryścina Mocnaja razam z maci.

Taksama Alija raspaviała ŭ instahramie, što sioleta razam z palitykam sadžała drevy ŭ budučym parku Narodnaha adzinstva.

Kamientary da artykuła