Stała viadoma, dzie pracuje favarytka Łukašenki Uładlena Zajcava
Uładlena Zajcava supravadžaje Łukašenku nie tolki na bałach, ale i, padobna, u zamiežnych pajezdkach. Kaliści «aficer» Zajcava pracavała na mytni, ale paśla konkursu «Mis Biełaruś» mnohaje źmianiłasia.
Siamja Uładleny davoli prostaja. Maci pracavała na «Mahiloŭchimvałakno», baćka dasłužyŭsia da kapitana milicyi, ale ŭ 2003 hodzie trapiŭ pad skaračeńnie. Paśla pracavaŭ u roznych miescach — byŭ načalnikam achovy (takija danyja ŭ bazach «Biełpoła»).
Sama Uładlena skončyła Mahiloŭski dziaržaŭny ŭniviersitet imia Arkadzia Kulašova.
U 2020 hodzie pracaŭładkavałasia ŭ Mahiloŭskuju abłasnuju fiłarmoniju.
Adnačasova dziaŭčyna zajmałasia ŭ Taćciany Pałazkovaj — kiraŭnicy Centra mody i Tvorčaha centra ŭ Mahilovie. Tam ža rychtujuć pryhažuń da aficyjnych mierapryjemstvaŭ. Pałazkova vučyć daŭhanohich i strojnych dziaŭčat vynosić čynoŭnikam kvietki ci sustrakać Łukašenku ŭ rehijonach chlebam-sollu.
Uładlena taksama była na roznych ideałahičnych mierapryjemstvach — dzieści treba ŭ nacyjanalnym stroi pastajać, dzieści pieradać čynoŭniku simvaličny kluč ad novaj palikliniki.
U 2021 hodzie Uładlena pierajšła pracavać na mytniu. Tady ž dziaŭčyna paŭdzielničała ŭ konkursie «Mis Biełaruś».
U vyniku jana zastałasia biez karony karalevy, ale praź niekalki miesiacaŭ pryhažuni daručyli tančyć z Łukašenkam na Respublikanskim bali moładzi. Potym jany nie adnojčy źjaŭlalisia razam na publicy.
Paśla taho konkursu Uładlena źmianiła miesca pracy — pierajšła ŭ Nacyjanalnuju škołu pryhažości. Letam 2022 hoda ŭ jaje pracoŭnaj knižcy źjaviŭsia novy zapis — Administracyja Łukašenki. Mienavita tam, zhodna z bazaj «Kibierpartyzanaŭ», i pa siońnia aficyjna pracuje Uładlena.
Uładlena lubić brendavyja rečy. Na inaŭhuracyju Łukašenki sioleta jana pryjšła ź biełaj kłasičnaj sumačkaj Chanel. Minijaciurny aksesuar ź miakkaj skury i łancužkovym ramniom kaštuje ciapier u firmovaj kramie ad 5 da 7 tysiač jeŭra (zaležyć ad pamieru i materyjału — naprykład, skura jahniaci abo cialačaja skura).
Dla hetaha ž mierapryjemstva dziaŭčyna vybrała błuzku italjanskaha brenda kłasa luks Elisabetta Franchi. Pieršapačatkova takaja kaštavała kala 400 jeŭra.
Čas ad času na Uładlenie možna pabačyć rečy i z mas-markietu. Naprykład, dla prahułki la Opiernaha teatra ciopłym majskim dniom jana vybrała majku ad rasijskaha brenda «Tvojo». Ale soniečnyja akulary — Jimmy Choo, takija kaštujuć takija kala 400 dalaraŭ.
Na fota, na jakim Uładlena abiedaje ŭ restaranie «Kantrast», na tonkim zapiaści dziaŭčyny možna pabačyć hadzińnik, padobna, šviejcarskaha premijalnaha brenda TAG Heuer, limitavanaj kalekcyi 2020 hoda. Košt na takuju madel u firmovych bucikach i ŭ aficyjnych dyleraŭ dachodziŭ da 4 tysiač jeŭra.
Kali-niekali dziaŭčyna nosić i mierč Łukašenki — naprykład, kiepku ź jaho cytataj.
Siarod chobi Uładleny — katańnie na hornych łyžach. Sioleta jana vykłała zdymak z hornałyžnaha kurortu va Uźbiekistanie. Dla aktyŭnaha adpačynku dziaŭčyna vybrała kurtku niamieckaha brenda premium-kłasa Bogner. Ciapier takaja kaštuje ad 1700 jeŭra.
U volny čas Uładlena taksama hraje ŭ kvizy, śpiavaje ŭ karaokie i byvaje z siabroŭkami na kancertach. Naprykład, u mai tančyła pad «Ruki vvierch».
Miarkujučy pa sacyjalnych sietkach Zajcavaj, jana davoli časta supravadžaje Łukašenku ŭ pajezdkach — navat kali nie traplaje ŭ abjektyvy dziaržaŭnych ŚMI. Tak, vosieńniu 2022 hoda Uładlena, padobna, była pobač z palitykam padčas jaho pieršaha aficyjnaha vizitu ŭ Abchaziju.
A sioleta dziaŭčyna była ź im u Maskvie na paradzie 9 maja i zdymała videa, jak Łukašenka vitaje biełaruskich vajskoŭcaŭ. Supadzieńnie ci nie, ale i ŭ Kitaj Uładlena sioleta trapiła.
Kamientary