Źmianiajecca sistema dziaržaŭnaj padtrymki sportu
17 vieraśnia Łukašenka padpisaŭ ukaz «Ab akazańni padtrymki spartyŭnym arhanizacyjam». Dakumient uvodzić novy miechanizm dziaržaŭnaj padtrymki dla spartyŭnych fiederacyj i kłubaŭ.
Zdymak ilustracyjny. Fota: NAK Biełarusi
Ciapier fiederacyi i kłuby zmohuć atrymlivać subsidyi z abaviazkovym metavym vykarystańniem srodkaŭ:
- fiederacyi — za košt respublikanskaha biudžetu,
- spartyŭnyja kłuby (jak pa hulniavych, tak i pa indyvidualnych vidach sportu) — za košt miascovych biudžetaŭ.
Adnačasova spyniajecca praktyka padtrymki spartyŭnych arhanizacyj praz padatkovyja lhoty dla sponsaraŭ (pa padatku na nieruchomaść, ziamielnamu padatku i padatku na prybytak).
Saviet Ministraŭ budzie rehulavać:
- pamier subsidyj i ahulny abjom padtrymki ad dziaržavy;
- uzrovień sponsarskaj dapamohi, rekłamy i inšych formaŭ padtrymki;
- zarabotnyja płaty kiraŭnikoŭ fiederacyj, spartsmienaŭ, trenieraŭ i śpiecyjalistaŭ.
Dla kłubaŭ, jakija źjaŭlajucca biudžetnymi arhanizacyjami, zachoŭvajecca finansavańnie ź biudžetu. Pry hetym ukaz nie abmiažoŭvaje prava arhanizacyj rasparadžacca samimi saboj zaroblenymi srodkami i sponsarskaj dapamohaj ad pryvatnych struktur.
Asobna praduhledžana stvareńnie ahulnakamandnaha pryzavoha fondu dla kłubaŭ pa hulniavych vidach sportu. Paradak i pamiery pryzavych pa vynikach siezona budzie vyznačać urad.
Ministerstva sportu atrymaje funkcyju kantrolu za vykarystańniem srodkaŭ, jakija pastupajuć ad dziaržavy, i za vykanańniem zakanadaŭstva ŭ śfiery fizičnaj kultury i sportu.
Jak adznačajecca, miery, praduhledžanyja ŭkazam, pavinny zabiaśpiečyć roŭnaje i prazrystaje raźmierkavańnie dziaržaŭnaj padtrymki, a taksama efiektyŭny kantrol za jaje vykarystańniem.
Čytajcie taksama:
Źmianili paradak dziaržaŭnaha rehulavańnia turystyčnaj śfiery
Funkcyi rehulatara ŭ turśfiery prapanujuć pieradać ad Minsportu Nacyjanalnamu ahienctvu pa turyźmie