Śledam za błakavańniem miesiendžaraŭ u Rasii chočuć abmiežavać zvanki z SIM-kartaŭ, jakija znachodziacca ŭ roŭminhu

Kiraŭnik Raskamnahladu Andrej Lipaŭ prapanavaŭ abmiežavać zvanki z rasijskich SIM-kartaŭ, jakija znachodziacca ŭ rouminhu. Maŭlaŭ, paśla zapusku antymachlarskaj sistemy Antyfrod u 2022 hodzie i błakavańnia zvankoŭ u WhatsApp i Telegram u žniŭni 2025 hoda ašukancy pačali vykarystoŭvać rasijskija SIM-karty za miažoj.

Fota ilustracyjnaje

Pa słovach čynoŭnika, nibyta kab zmahacca z machlarami praviarajecca praca mabilnych apierataraŭ, i na asnovie danych sistemy im prapanujuć ačyścić bazy ad fejkavych karystalnikaŭ. Akramia taho, apieratary pavinny ŭ režymie anłajn paviedamlać płatformam i miesiendžaram pra SIM-karty ŭ roŭminhu, kab dla ich možna było ŭvodzić časovyja abmiežavańni.

Andrej Lipaŭ adznačyŭ, što pry hetym pavinny zachoŭvacca pravy hramadzian na suviaź i budzie stvorana sistema vyklučeńniaŭ dla sumlennych karystalnikaŭ, jakija jeduć za miažu pa pracy abo na adpačynak.

Prapanavanyja miery buduć uklučanyja ŭ druhi pakiet baraćby z machlarstvam i nakiravanyja ŭ ŭrad.

Nieabchodnaściu zmahańnia z telefonnymi machlarami rasijskija ŭłady aficycyjna arhumientavali i abmiežavańnie zvankoŭ u Telegram i WhatsApp 13 žniŭnia.

Pry hetym, jak śviedčyć statystyka, machlary zvoniać rasijanam pa zvyčajnym telefonie ŭ try razy čaściej, čym praź miesiendžary.

Kamientary da artykuła