Jak błakujuć zvanki ŭ miesiendžarach? Ci mohuć heta zrabić u Biełarusi i jak tady zvanić u Telegram?
U Rasii dniami abmiežavali zvanki ŭ miesiendžarach — Telegram i WhatsApp. Raskazvajem, jak dziaržavy mohuć błakavać takija zvanki i jak abyści błakiroŭku, kali takoje adbudziecca ŭ Biełarusi.
Jak błakujucca zvanki ŭ miesiendžarach
U mnohich dziaržavach, u tym liku ŭ Biełarusi, u śpiecsłužbaŭ jość abstalavańnie dla filtracyi i pierachopu internet-trafiku. Jano vykarystoŭvaje technałohiju Deep Packet Inspection (DPI), abo hłyboki analiz pakietaŭ. Technałohija dazvalaje analizavać trafik, jaki pieradajecca pa sietcy, i vyznačać jaho typ pa jaho admietnych rysach.
Mnohija miesiendžary dla pieradačy hołasu vykarystoŭvajuć viadomyja sietkavyja pratakoły abo standarty (naprykład, SIP dla ŭstanoŭki sieansu vykliku). Technałohija DPI dazvalaje błakavać cełyja pratakoły. Taksama možna zabłakavać zvanok pa viadomych siervierach, jakija naležać miesiendžaru — takich siervieraŭ abmiežavanaja kolkaść, i śpis možna dynamična abnaŭlać.
Ale bolšaść viadomych miesiendžaraŭ navučylisia abychodzić prostyja pieraškody. Tamu technałohii błakavańnia ŭskładniajucca, i ciapier analizujucca nie kankretnyja pratakoły ci sierviery, a «źniešni vyhlad» trafiku. Hałasavy trafik (VoIP) adroźnivajecca ad zvyčajnaj pierapiski: u vypadku zvanka, jak praviła, idzie bieśpierapynny patok nievialikich pa pamiery pakietaŭ z prykładna roŭnym abjomam uvachodnych i zychodnych danych.
Taki šabłon lohka vyjavić navat u šyfravanym trafiku — heta nie dazvolić daviedacca, pra što razmova, ale dazvolić zabłakavać vyklik.
U Biełarusi padčas padziej žniŭnia 2020 hoda ŭkaraniali DPI-sistemy ad kanadskaj sistemy Sandvine (jana razarvała kantrakt z uradam Biełarusi 16 vieraśnia 2020). Jany dazvalali błakavać navat šyfravanyja złučeńni — naprykład, całkam adklučać biaśpiečny HTTPS-trafik, kali sistema razumieła, što złučeńnie idzie da «niepažadanaha» resursu, ci całkam adklučać mnohija vidy trafiku. Ahułam, mahčymaści dla filtracyi VoIP-zvankoŭ u Biełarusi ŭžo isnujuć.
Jak abychodzić błakiroŭku zvankoŭ
U Biełarusi pakul što nie abmiažoŭvajuć zvanki praź miesiendžary. Ale takoje moža zdarycca ŭ luby momant. Jak tady abyści błakiroŭku?
Klučavoje tut — mieć zahadzia padrychtavany płan na vypadak, kali zvykły sposab suviazi akažacca niedastupnym, i asvoić instrumienty dla abychodu błakirovak zahadzia. Chutčej za ŭsio, u vypadku błakirovak biełaruskija miedyja i ajci-supolnaść chutka prapanujuć rašeńnie, ale dla hetaha važna zastavacca na suviazi.
Samaje elemientarnaje rašeńnie — vykarystoŭvać inšyja prahramy i miesiendžary. Naprykład, možna sazvanicca ŭ adnym ź inšych miesiendžaraŭ, tut my rabili vialikaje ich paraŭnańnie (tut — asobna pra Element/Matrix). Abo abrać inšy servis — naprykład, Zoom, Google Meet, Jitsi Meet, Jami, Cisco Webex, Microsoft Teams. Važna abirać nadziejnyja servisy — markietynhavyja abiacańni časta akazvajucca chłuśnioj.
Jašče adzin varyjant — VPN. Tut my raskazvali, jakija ź ich biaspłatnyja i nadziejnyja. Płatnyja VPN časta dajuć dadatkovyja funkcyi — naprykład, mahčymaść maskiroŭki trafiku dla abychodu błakirovak. A tut my pisali pra admysłovyja servisy dla abychodu błakirovak, takija, jak Psiphon, Tachyon, Lantern dy inšyja.
Bolš składanyja rašeńni
Taksama vy možacie stvaryć ułasny VPN, naprykład, pa našym hajdzie pa Outline i Amnezia. Stvorany nami dla testu na tannym sierviery vydatna pracuje ŭ Rasii: dazvalaje ździajniać zvanki i adkryvać zabaronienyja resursy.
Možna skarystacca braŭzieram TOR (kali spasyłka nie pracuje, to dašlicie email z nazvaj vašaj apieracyjnaj sistemy na adras [email protected]). Jaho taksama možna naładzić u režymie proksi — naprykład, u prahramie Orbot dla iOS i Android, pa hetym hajdzie dla Mac i hajdzie dla Windows.
Jašče adzin varyjant — proksi-sierviery. Voś hajdy pa dałučeńni da proksi ŭručnuju na Windows, Android, iOS i Mac.
Važna karystacca tolki nadziejnymi HTTPS/SOCKS5-proksi abo śpiecyfičnymi dla miesiendžara. HTTP-proksi zusim nie šyfrujuć vaš trafik, zvyčajna typ proksi ŭkazany pry kupli abo na resursie, dzie jość adkrytyja śpisy proksi. Lepš amal luby inšy varyjant, čym proksi ź internetu, jakomu vy nie daviarajecie.
U telehramie pa zmoŭčańni jość funkcyja padklučeńnia (tut jość hajd) da MTProto Proxy, adnosna niadaŭna takuju funkcyju padklučyŭ i WhatsApp (hajd tut). Lepš padklučacca da davieranych proksi abo stvaryć ułasny, bo choć siervier HTTPS/SOCKS5-proksi nie moža čytać paviedamleńni, ale moža zapisvać złučeńni.
WhatsApp maje aficyjny repazitoryj, z dapamohaj jakoha možna stvaryć proksi dla miesiendžara vielmi chutka.
«Naša Niva» — bastyjon biełaruščyny
PADTRYMAĆ
Kamientary