Polšča znoŭ zaklikała svaich hramadzian nieadkładna pakinuć Biełaruś

Polskaje pasolstva zaklikała svaich hramadzian, jakija znachodziacca ŭ Biełarusi, nieadkładna pakinuć krainu na vypadak «zakryćcia miežaŭ ci inšych niepradbačanych abstavin».

Fota ilustracyjnaje

U paviedamleńni dypłamatyčnaj misii pra adkryćcio miažy pamiž Polščaj i Biełaruśsiu adznačajecca, što situacyja ŭ rehijonie napružanaja, praciahvajecca vajna, a taksama mieli miesca vypadki advolnych zatrymańniaŭ polskich hramadzian.

U pasolstvie padkreślili, što ŭ vypadku rezkaha paharšeńnia biaśpieki evakuacyja moža stać vielmi składanaj abo navat niemahčymaj. Hramadzianam Polščy rajać vykarystoŭvać usie dastupnyja kamiercyjnyja i pryvatnyja srodki dla vyjezdu ź Biełarusi.

Raniej zaklik dla polskich hramadzian pakinuć terytoryju Biełarusi MZS Polščy vydavała 5 vieraśnia paśla zatrymańnia katalickaha manacha Hžehaža Havieła, jaki abvinavačvajecca ŭ špijanažy.

25 vieraśnia polska-biełaruskaja miaža była adkrytaja paśla amal dvuchtydniovaha zakryćcia. 12 vieraśnia jaje zakryli z-za «pavieličeńnia kolkaści pravakacyj z boku Rasii i Biełarusi» i sumiesnych vajskovych vučeńniaŭ «Zachad-2025».

Pradstaŭniki polskaha ŭrada, uklučajučy premjer-ministra Donalda Tuska, papiaredžvali, što ŭ vypadku paharšeńnia situacyi miežy mohuć znoŭ biez vahańniaŭ zakryć.

Kamientary da artykuła