Čakańni — realnaść. U Vierchnim horadzie zaviaršajuć ambicyjny kompleks u vielmi sproščanym vyhladzie FOTY
Šmatfunkcyjanalny kompleks na Haradskim Vale płanavali zdać jašče niekalki hadoŭ tamu. Ciapier praź finansavyja ciažkaści admovilisia litaralna ad usiaho architekturnaha dekoru i składanych elemientaŭ.
Jak ciapier vyhladaje šmatfunkcyjanalny kompleks u Vierchnim horadzie. Fota: telehram-kanał «Minsk i minčanin»
Budoŭla na skryžavańni Internacyjanalnaj, Haradskoha Vała i Kamsamolskaj — adna z samych prablemnych u centry Minska. Z pačatku 2000‑ch tut biznesmien Siarhiej Dziamčuk sprabavaŭ na hrošy dolščykaŭ uźvieści biznes-centr z handlovaj halerejaj. Ale budaŭnictva chutka spyniłasia i pieratvaryłasia ŭ daŭhabud, jaki psavaŭ histaryčny centr horada, a sam zabudoŭščyk u vyniku trapiŭ za kraty pa abvinavačańni ŭ machlarstvie.
Kompleks na rendarach u 2020 hodzie mieŭ cahlanyja fasady i darahoje zaškleńnie. Fota: vytvorča-tvorčaja majsternia «Atry»
Šmatfunkcyjanalny kompleks na rendarach. Fota: vytvorča-tvorčaja majsternia «Atry»
Daŭhabud byŭ kančatkova źniesieny rašeńniem Minharvykankama, a ziamlu vystavili na aŭkcyjon. Letam 2019 hoda ŭčastak za 4,5 miljona rubloŭ nabyŭ novy inviestar — kampanija «VilniusBudInviest».
Pavodle prajekta, raspracavanaha architekturnaj majsterniaj «Atry», unutry histaryčnaha kvartała musiŭ paŭstać šmatfunkcyjanalny hramadski centr płoščaj kala 10 tysiač kvadratnych mietraŭ, jaki ŭklučaŭ haścinicu, kaviarni, kramy i padziemny parkinh.
Piešachodnaja vulica pamiž karpusami kompleksu na rendarach. Fota: vytvorča-tvorčaja majsternia «Atry»
Piešachodnaja vulica pamiž karpusami kompleksu na rendarach. Fota: vytvorča-tvorčaja majsternia «Atry»
Pa prajekcie kompleks składaŭsia ź niekalkich čatyrochpaviarchovych abjomaŭ z zakruhlenymi vuhłami, padzielenych piešachodnymi vułačkami, praź jakija byli pierakinuty vytančanyja zašklonyja pierachody.
Kožny z karpusoŭ mieŭ svajo sučasnaje architekturnaje rašeńnie. Karpusy, jakija vychodzili da vulicy Haradski Vał, byli vybudavanyja na kantraście čyrvonaj i biełaj cehłaj, jakaja pavinna była stać asnoŭnym materyjałam adździełki fasadaŭ.
Adzin z karpusoŭ architektary rytmična članili vysokimi viertykalnymi voknami, jakija ŭ vuhłavoj častcy prykryvała paŭprazrystaja dekaratyŭnaja ścienka z čyrvonaj cehły. Fasady susiedniaha korpusa, vykananaha ŭ biełaj cehle, mieli sparavanyja vokny sa skošanymi adkosami. Va ŭsich prajomach — modnyja ciapier zapaŭnieńni biez članieńniaŭ, na vuhłach — skruhlenaje zaškleńnie.
Niedabudavany kompleks u vieraśni 2024 hoda. Fota: telehram-kanał «Minsk i minčanin»
U takim ambicyjnym vyhladzie kompleks musiŭ być skončanym jašče ŭ 2023 hodzie. Ale byŭ uźviedzieny žalezabietonny karkas i ścieny, paśla čaho budaŭnictva zaciahnułasia. Zabudoŭščyk sutyknuŭsia ź finansavym prablemami, a paśla ŭźviadzieńnia zachodnimi krainami sankcyj niekatoryja zaprajektavanyja rašeńni stali niepadjomna darahimi.
Adsutnaść hrošaj vielmi niehatyŭna adbiłasia na architektury kompleksu. Zamiest klinkiernaj cehły fasady vykanali ŭ lohkaj tynkovačnaj sistemie — sa zvyčajnaha ŭciaplalnika i tynkoŭki pa sietcy.
Taki varyjant zvyčajna vykarystoŭvajuć pry biudžetnych kapitalnych ramontach, dzie najpierš treba ŭciaplić, a estetyka adychodzić na druhi płan. Praz 3‑5 hadoŭ takija sistemy ŭ biełaruskim klimacie nabyvajuć nieachajny vyhlad, a na paciamniełaj ad brudu i vilhaci pavierchni prastupajuć śvietłyja parasoniki macavańniaŭ uciaplalnika.
Ni cehły na fasadach, ni zakruhlenaha zaškleńnia na vuhłach karpusoŭ, jakija byli ŭ prajekcie, nie budzie ŭ hatovym kompleksie. Fota: vytvorča-tvorčaja majsternia «Atry»
Ale, vidać, zabudoŭščyk nastolki nie maje hrošaj, što navat nie pasprabavaŭ zymitavać cehłu. Zrazumieła, što ni pra jakija dekaratyŭnyja ścienki ŭžo havorki nie išło, jak i pra vyhnutaje škło — technałohiju, viadomuju z pačatku XX stahodździa, ale dahetul niedastupnuju biełaruskim vytvorcam — na jaho miescy ŭ vuhłach karpusoŭ pastavili samyja zvyčajnyja zapaŭnieńni. Inšyja vokny taksama spraścili, dadaŭšy framuhi.
U vyniku zamiest ambicyjnaha kompleksu ŭ takim adkaznym i spakusnym histaryčnym miescy źjaviŭsia vielmi sproščany jaho varyjant, kali nie skazać prymityŭny. Da jaho chutkaha zaviaršeńnia, vidać, padšturchnuli tolki vyznačanyja ŭmovami aŭkcyjonu terminy asvajeńnia placoŭki.
Pieršapačatkovy varyjant byŭ nakiravany architekturna-horadabudaŭničaj radaj na dapracoŭku, bo jaho členy paličyli, što «architektura — nijakaja». Vyhlad, u jakim dabudoŭvajuć kompleks, značna horšy za hety adkinuty varyjant. Fota: vytvorča-tvorčaja majsternia «Atry»