«Niepasłuchmianyja» (Wayward) — strašny sieryjał pra škołu, ad jakoha nie adarvacca

U Netflix novy chit. Tryler «Niepasłuchmianyja» ŭžo niekalki tydniaŭ trymajecca ŭ suśvietnym topie. Čym ža jon vabić ludziej?

Fota: kadr z trejlera trylera «Niepasłuchmianyja» (Wayward)

«Niepasłuchmianych» stvaryła kanadskaja aktrysa i scenarystka Mej Marcin. Žudasnaja historyja z prysmakam choraru napisanaja na asnovie realnych padziej, bo niekali ŭ padobnyja ŭmovy trapiła jaje najlepšaja siabroŭka.

Marcin uziała na siabie i hałoŭnuju rolu. Jana hraje palicejskaha Aleksa Dempsi, jaki pryjazdžaje razam ź ciažarnaj žonkaj u miastečka Toł-Pajns (Marcin siabie pryličaje da niebinarnych ludziej — ni mužčyn, ni žančyn).

Dempsi dałučajecca da kamandy miascovych palicejskich i chutka razumieje: Toł-Pajns — zusim nie idyličnaje miastečka, jak jaho prezientujuć. U pieršy ž dzień na pracy da Aleksa z naparnikam prybiahaje akryvaŭleny padletak. Heta Rajli, vučań tutejšaj škoły dla składanych padletkaŭ, i jon viedaje, što nasamreč chavajecca za pryhožymi łozunhami kiraŭnicy škoły.

Fota: kadr z trejlera

Darečy, pra jaje. Evielin Uejd kiruje škołaj nie pieršaje dziesiacihodździe i za hety čas stvaryła svoj kult. Valavaja lidarka manipuluje śviadomaściu vučniaŭ, vykarystoŭvaje ich niehatyŭnyja pačućci i pražytyja traŭmy, kab złamać ich volu da žyćcia i zrabić ź ich pasłuchmianych darosłych. I heta ŭsio — pad prykryćciom dapamohi ŭ vychavańni, za jakuju baćki vučniaŭ płaciać šalonyja hrošy.

Tym časam u Kanadzie zaviazvajecca siabroŭstva dźviuch dziaŭčat-padletkaŭ, Łajły i Ebi. Razam jany fanaciejuć ad «bitłoŭ», prahulvajuć škołu i sprabujuć narkotyki. Ebi pasłuchmiana idzie na ŭsio, što joj prapanoŭvaje Łajła, a taja chavaje za narkotykami i sumnieŭnymi suviaziami bol z-za siamiejnaj trahiedyi.

Fota: kadr z trejlera

Ebi i Łajła — zvyčajnyja padletki, jakim prosta nie chapiła lubovi starejšych, i tamu jany zahłušajuć rany chutkimi i źniešnie efiektyŭnymi sposabami. Im možna było b dapamahčy, kali b atačyć sapraŭdnym kłopatam, a nie ličyć ich samich prablemaj. Ale ž na dziaŭčatach staviać klajmo składanych padletkaŭ, i ich šlach pierasiakajecca z Evielin Uejd.

A jašče z Aleksam Dempsi, tamu što palicejski nie zastaniecca ŭ baku ad padziej u akademii Toł-Pajns i pasprabuje razabracca, što ž tam dziejecca. Matyvuje jaho ŭ tym liku toje, što žonka Aleksa, Łora, sama niekali skončyła tuju škołu i maje ŭłasnuju tajamničuju historyju, źviazanuju z akademijaj.

Serca hetaha sieryjała, jak i škoły — Evielin Uejd, jakuju hraje tytułavanaja aŭstralijka Toni Kalet z uznaharodami ŭ bijahrafii nakštałt «Emi» i «Załatoha hłobusa». U Kalet atrymałasia abajalnaja psichapatka, adna z tych, čyju sutnaść zaŭvažaješ nie adrazu. Toje, jak jana začaroŭvaje ludziej, pužaje. Kalet hraje hierainiu, jakaja stvaraje vakoł siabie atmaśfieru strachu, jak tolki ŭvachodzić u pamiaškańnie, ale pry hetym paradaksalnym čynam zdolnaja pryvablivać ludziej tak blizka, što moža pierałomvać ich jak zapałki.

Biez Toni Kalet hety sieryjał nie ŭdaŭsia b, ale adznačym i pracu inšych akcioraŭ, u tym liku Alivii Lind i Sidni Topłajf, jakim dastalisia roli adpaviedna Łajły i Ebi. Čaho nie skažaš pra Saru Hadon, vykanaŭcu roli Łory, žonki Aleksa. Hetyja dvoje vyhladajuć u kadry nastolki čužymi ludźmi, što prajavy intymnaści ŭ kadry pamiž imi padajucca falšu.

Fota: kadr z trejlera

Usie vosiem sieryj «Niepasłuchmianych» vyjšli ŭ kancy vieraśnia. Prajekt užo treci tydzień trymajecca ŭ suśvietnym top-10 sieryjałaŭ Netflix, uvachodzić u anałahičnyja śpisy ŭ 70 krainach.

Na kinapłatformie Rotten Tomatoes sieryjał maje prystojnyja 77% uchvaleńnia ad krytykaŭ, i navat tyja, chto krytykuje prajekt, časta adznačajuć, nakolki cikavyja idei jon uzdymaje. Nie zaŭždy, praŭda, hetyja idei atrymlivajecca dakrucić da kanca z adpaviednym uzroŭniem napružanaści. 

Sieryjał spałučaje ŭ siabie roznyja žanry. Heta i detektyŭ, i padletkavaja drama, a ŭ niekatorych momantach i vielmi pierakanaŭčy chorar. I ŭ dadatak — mocny sacyjalny kamientar pra adukacyju, staleńnie i kulty.

Kamientary da artykuła