Pucin i Tramp mohuć sustrecca ciaham dvuch tydniaŭ
Sustreča prezidentaŭ ZŠA i Rasii ŭ Budapiešcie moža adbycca ciaham dvuch tydniaŭ. Taki termin u Biełym domie, adkazvajučy na pytańni žurnalistaŭ, nazvaŭ Donald Tramp.
Donald Tramp i Uładzimir Pucin padčas sustrečy na Alascy 15 žniŭnia 2025 hoda. Fota: Jae C. Hong / AP
«Ja b skazaŭ, ciaham dvuch tydniaŭ. Davoli chutka. Marka Rubia źbirajecca sustrecca sa svaim kaleham, jak vy viedajecie, Łaŭrovym. I jany sustrenucca davoli chutka. Jany źbirajucca pryznačyć čas i miesca ŭ samy bližejšy čas. Mahčyma, užo pryznačana. Jany ŭžo havaryli pra heta», — skazaŭ jon.
Učora adbyłasia telefonnaja razmova Trampa i Pucina. Adnoj z temaŭ razmovy była pieradača Ukrainie Vašynhtonam rakiet «Tamahaŭk».
Pamočnik Pucina Juryj Ušakoŭ zajaviŭ, prezident Rasii ŭ razmovie z Trampam zajaviŭ, što mahčymaja pastaŭka rakiet «Tamahaŭk» naniasie istotnuju škodu adnosinam dźviuch krain, nie kažučy ŭžo pra pierśpiektyvy ŭrehulavańnia va Ukrainie», — zajaviŭ Ušakoŭ.
Na ŭdakładniajučaje pytańnie, ci prymie Tramp rašeńnie ab pastaŭkach hetych rakiet va Ukrainu da sustrečy z Pucinym, Ušakoŭ adkazaŭ tak: «Tramp zhadaŭ, što jon zaŭtra sustrakajecca ź Zialenskim, i skazaŭ taksama, što padčas kantaktu ź Zialenskim jon uličyć tyja mierkavańni, jakija byli vykazanyja prezidentam Rasiei padčas siońniašniaj telefonnaj razmovy».
Potym Tramp skazaŭ žurnalistam, što «Tamahaŭki» patrebnyja samim Štatam: «Nam taksama patrebnyja «Tamahaŭki» dla Złučanych Štataŭ Amieryki. U nas ich šmat, ale jany nam patrebnyja. My nie možam vysilvać našu krainu. Jany vielmi važnyja. Jany vielmi mahutnyja. Jany vielmi dakładnyja. Jany vielmi dobryja. Ale jany nam taksama patrebnyja. Ja nie viedaju, što my možam z hetym zrabić».
Mierkavałasia, što pieradača «Tamahaŭkaŭ» budzie abmiarkoŭvacca siońnia ŭ Biełym domie na sustrečy z Uładzimiram Zialenskim.