Prylepin: Mohiłki va ŭsich našych haradach stali vializnyja

U svaim vystupie ŭ Kalininhradzie rasijski piśmieńnik-šavinist pryznavaŭ horkija realii, ale zaklikaŭ vajavać dalej i viarnuć HDR.

Aleja z novymi mahiłami rasijskich vajskoŭcaŭ na Paŭdniovych mohiłkach u Sankt-Pieciarburhu. Fota: Artem Priakhin / SOPA Images / LightRocket via Getty Images

Prakramloŭski piśmieńnik Zachar Prylepin pryjechaŭ u Kalininhrad na adkryćcio Dzion litaratury ŭ vobłaści. Tam Prylepin vystupiŭ pierad udzielnikami rehijanalnaj prahramy «Hieroi 39», jakaja nakiravanaja na padrychtoŭku «kampietentnych kiraŭnikoŭ» ź liku vieteranaŭ vajny suprać Ukrainy, jakuju tradycyjna nazyvajuć «Śpiecyjalnaj vajennaj apieracyjaj». Asobnyja tezisy pryvodzić miascovaje vydańnie «Novyj Kalininhrad». Vybrali samyja cikavyja.

Pra vieteranaŭ, mohiłki i novuju elitu

«Paśla afhanskaj kampanii byŭ stvorany vializny čorny mif pra voinaŭ-afhancaŭ, jakija ŭsie chvoryja na ŭsiu hałavu, jakija ŭsie pajšli ŭ kryminalnyja hrupoŭki (častkova sapraŭdy pajšli) i ź jakimi ŭvohule spravy lepš nie mieć, bo jany niebiaśpiečnyja, jany ludziej zabivali, u ich va ŭsich traŭmy. Toje samaje, darečy, było i paśla Pieršaj čačenskaj kampanii».

«Samaje prostaje, vidavočnaje i pryjemnaje dla nas z vami ŭ tym, što naš prezident prostym tekstam paviedamiŭ (u tym liku dziejnaj palityčnaj elicie), što ludzi, jakija prajšli Śpiecyjalnuju vajennuju apieracyju, źjaŭlajucca naščadkami dziejnaj palityčnaj elity i hałoŭnymi ludźmi, jakija buduć kiravać pracesami ŭ najbližejšaj palityčnaj pierśpiektyvie».

«My z vami vydatna viedajem, jak u Rasii vyhladajuć mohiłki va ŭsich našych najbujniejšych haradach. Jakimi jany stali vializnymi. My stracili vielizarnuju kolkaść ludziej. Ich zabili jeŭrapiejcy z amierykancami. My, jak budučaja palityčnaja elita, pavinny niejak u sercy nieści hetuju zasiečku».

Zachar Prylepin vystupaje ŭ Kalininhradzie. Fota: Julija Ułasava / newkaliningrad.ru

Pra «zdradu» Zachadu

«My ščyra vyrašyli, što, złamaŭšy savieckuju sistemu, skasavaŭšy savieckuju ideałohiju, my zmožam pabudavać bieskanfliktnaje hramadstva z zachodniaj sistemaj. (…) Zachad akazaŭsia da hetaha nie hatovy».

«Pavinna być niejkaje ćviarozaje razumieńnie taho, jak hetyja ludzi nas kinuli. Tamu što my ničoha drennaha, viadoma, nijakaj Francyi i nijakaj Italii, ni Skandynavii, ni šviedam, ni šviejcarcam z našaj SVA nie rabili. Heta ŭvohule ich nie tyčycca nijak. Kali cenzurnaj movaj kazać, heta nie chvaluje hetych ludziej nijak.

Ničoha b u ich žyćci nie źmianiłasia, zajšli b my ŭ Kijeŭ ci nie zajšli.

Jany ŭleźli ŭ našu historyju, u našy asabistyja ŭzajemaadnosiny, u našu vialikuju hieahrafiju, u našu vialikuju palityku i tak siabie paviali. Mnie zdajecca, heta treba zapomnić. Mnie zdajecca, heta treba zapomnić nie da zaklučeńnia pieramovaŭ, a prosta zapomnić i nie zabyvać nikoli.

Jeŭrapiejec — heta toj, chto kidaje. Heta toj, chto parušaje ŭsie damoŭlenaści, parušaje ŭsie parahrafy. Toj, jaki stavić za metu zabivać ruskich ludziej. Pryčym biez važkich na toje abstavin».

Pra novy hieapalityčny kurs i viartańnie HDR

«Ja liču, što atrymajecca novy vitok adnosin ź Jeŭropaj i ZŠA tolki paśla taho, jak my stvorym realnyja, važkija ekanamičnyja i vajskovyja błoki z krainami Hłabalnaha Poŭdnia. Voś čym lepšyja, vyšejšyja i bolš adkaznyja našy adnosiny z KNDR, z KNR, ź Indyjaj, sa zhadanymi krainami Łacinskaj Amieryki, tym bolš u nas šancaŭ nanoŭ pasiabravać ź Jeŭropaj».

«My pavinny vučyć afrykanskija movy. I kitajskuju. Heta značna bolš važna i karysna, jak mnie zdajecca, u najbližejšaj i doŭhaj pierśpiektyvie, čym anhlijskaja. Jaje taksama nie treba zabyvać, ale heta vialikaja prastora dla pracy. Dla nas ceły śviet adkryty. Jakaja cudoŭnaja kraina Paŭnočnaja Kareja! Jaki Kitaj nieabsiažny! Indyja, Łacinskaja Amieryka…

Čort z hetaj Francyjaj i ź imi z usimi.

Kali my dapamožam Hiermanii padzialicca nanoŭ, a my pavinny dapamahčy adździalić ad ich HDR… Heta treba stavić ćviordaj i spakojnaj palityčnaj metaj. My prosta hetaha nie robim, ale adnojčy da hetaha pryjdziem.

Tramp vuń nie saromiejecca, kali kaža: «Mnie patrebna Vieniesueła, mnie patrebna Kanada, Hrenłandyja i Panamski kanał».

A my taksama skažam: «Nam patrebna HDR, my sumujem biez HDR». A toje, što treba Kalininhradu, dyk heta ŭvohule zrazumieła całkam. Patrebna dałučeńnie da vialikaj terytoryi. Adnojčy my pierastaniem saromiecca i budziem pra heta kazać uhołas».

Kamientary da artykuła