Sarkazi pryjechaŭ u turmu adbyvać termin. Jaho supravadžała žonka Karła Bruni
Były prezident Francyi Nikala Sarkazi ŭ aŭtorak, 21 kastryčnika, prybyŭ u paryžskuju turmu Sante, kab pačać adbyvać piacihadovaje pakarańnie. Sarkazi staŭ pieršym byłym prezidentam Francyi, jaki atrymaŭ realny turemny termin.
Były prezident Francyi Nikala Sarkazi i jahonaja žonka Karła Bruni-Sarkazi pakidajuć svoj dom u Paryžy i nakiroŭvajucca ŭ turmu. Fota: AP Photo / Thibault Camus
Sarkazi byŭ asudžany na piać hadoŭ źniavoleńnia za ŭdzieł u niezakonnym finansavańni jaho prezidenckaj kampanii 2007 hoda livijskim režymam Muamara Kadafi. Śledstva śćviardžała, što miljony jeŭra pierapraŭlalisia ŭ Paryž u čamadanach. Sam eks-prezident svaju vinu admaŭlaŭ.
U turmie Sarkazi budzie raźmieščany ŭ adzinočnaj kamiery, u śpiecyjalnym błoku, jaki patrabuje pavyšanaj abarony. Adnak nijakich asablivych umoŭ utrymańnia dla jaho nie praduhledžana. Jamu naležyć standartnaja kamiera pamieram da 12 kv.m, z dušam, chaładzilnikam i televizaram.
Paviedamlajecca, što Sarkazi, jakomu 70 hadoŭ, płanuje napisać knihu pra svajo znachodžańnie za kratami.
Pry hetym, zhodna z francuzskimi zakonami, z-za svajho ŭzrostu jon moža adrazu paśla pačatku źniavoleńnia chadajničać ab vyzvaleńni pad nahlad.
Sarkazi staŭ pieršym byłym prezidentam Francyi, jaki atrymaŭ realny turemny termin. Napiaredadni źniavoleńnia, 17 kastryčnika, prezident Francyi Emaniuel Makron pryniaŭ Sarkazi u Jelisiejskim pałacy. Ministr justycyi Žerald Darmanen zajaviŭ, što naviedaje Sarkazi ŭ turmie.
U turmu Sarkazi supravadžała žonka Karła Bruni.