Dla pavietranych šaroŭ ź Biełarusi ŭ Litvu spryjalny viecier dźmie 51 dzień u hod
Kantrabandnyja pavietranyja šary ź Biełarusi zapuskajucca, kali viecier nakiroŭvaje ich u bok Vilenskaha aeraporta, kaža premjer Inha Ruhinienie. Pavodle danych Litoŭskaj hidramietearałahičnaj słužby, dla hetaha najbolš spryjalny paŭdniova-zachodni viecier u Vilni dźmie prykładna 51 dzień u hod, čaściej sustrakajecca vosieńniu i zimoj, piša LRT.
Praŭda, padčas spynieńniaŭ pavietranaha ruchu, što adbylisia minułaha tydnia ŭ stalicy Litvy, fiksavalisia i ŭschodnija, paŭdniova-ŭschodnija i paŭdniovyja viatry. Viatry ŭsich čatyroch napramkaŭ u Vilni na vyšyni 10 mietraŭ dźmuć kala 54% usiaho času, heta značyć ažno 197 dzion u hod.
Adnak, jak adznačaje kiraŭnik adździeła klimatałohii Litoŭskaj hidramietearałahičnaj słužby Danatas Valukas, napramak vietru kala ziamli i na vyšyni niekalkich kiłamietraŭ, dzie laciać šary, supadaje nie zaŭsiody.
«Zvyčajna na roznych vyšyniach napramki zbolšaha adpaviadajuć tamu, što bližej da ziamli, ale nie zaŭsiody adzin da adnaho. Situacyja moža być i zusim procilehłaja. Viadoma, im, mahčyma, poŭnaja dakładnaść i nie patrebna. Im hałoŭnaje — kab šary trapili na terytoryju Litvy.
Darečy, kožny čałaviek moža zaŭvažyć tyja davoli redkija vypadki, kali viecier dźmie i drevy chilacca ŭ adzin bok, a padniaŭšy vočy ŭ nieba, bačyš, što vobłaki ruchajucca ŭ inšy bok», — rastłumačyŭ jon LRT.lt.
U Vilni najbolš častyja paŭdniovyja i zachodnija viatry.
Pavodle danych, pryviedzienych u vydańni Litoŭskaj hidramietearałahičnaj słužby 2023 hoda «Klimatyčny atłas Litvy 1991—2020 hh.», u Vilni pieravažajuć paŭdniovyja i zachodnija viatry. 19% usiaho času, kali dźmie viecier, jon maje paŭdniovy napramak, 17% — zachodni, 15% — paŭdniova-ŭschodni, pa 14% — paŭdniova-zachodni i paŭnočna-zachodni. Najmienš častyja — paŭnočnyja (9%), paŭnočna-ŭschodnija i ŭschodnija viatry (pa 6%). Kala 5% usiaho času ŭ Vilni fiksujecca zacišša, heta značyć štyl abo słaby viecier, nie macniejšy za 0,5 mietra ŭ siekundu.
U vydańni tłumačycca, što paŭdniovych napramkaŭ viatry ŭ Litvie čaściej byvajuć uzimku, kali atmaśfiernaja cyrkulacyja pierabudoŭvajecca na chałodny pieryjad i aktyvizujecca Sibirski antycykłon.
Uviesnu kolkaść paŭdniovych viatroŭ pačynaje źmianšacca, a paŭnočnych — pavialičvacca. U sakaviku i krasaviku jašče davoli častyja ŭschodnija i paŭdniova-ŭschodnija viatry.
«Uletku daminujuć zachodnija viatry, adnak pavialičvajecca i kolkaść paŭnočnych (asabliva paŭnočna-zachodnich) viatroŭ. Redkimi stanoviacca ŭschodnija, paŭdniova-ŭschodnija i paŭdniovyja viatry», — adznačajecca ŭ vydańni.
Uvosień viatry znoŭ viartajucca da typovych dla chałodnaha pieryjadu napramkaŭ: kolkaść paŭnočnych i paŭnočna-ŭschodnich viatroŭ źmianšajecca, a paŭdniovych, paŭdniova-zachodnich i paŭdniova-ŭschodnich — pavialičvajecca. Chacia zachodnija viatry krychu radziejuć, ale z-za daminujučaha zachodniaha pieranosu jany ŭsio adno zastajucca častymi.