Biełaruskim firmam dazvolili atrymlivać ad inšaziemcaŭ najaŭnuju valutu nie tolki za ekspart
U Biełarusi pačało dziejničać novaje praviła, jakoje spraščaje viadzieńnie źniešnieekanamičnaj dziejnaści. Biznes ciapier maje bolš mahčymaściaŭ pracavać z zamiežnaj valutaj najaŭnymi. Heta praduhledžana sumiesnaj pastanovaj Savieta Ministraŭ i Nacbanka.
Fota ilustracyjnaje
Raniej, zhodna z normaj 2022 hoda, biełaruskija kampanii mahli atrymlivać najaŭnyja dalary ZŠA, jeŭra i juani tolki pa ekspartnych apieracyjach. Ciapier, z 13 listapada, hetaje prava raspaŭsiudžana i na impartnyja ździełki.
Kab jurydyčnyja asoby — rezidenty mahli atrymać zamiežnuju valutu ad nierezidentaŭ, nieabchodna:
- zaklučyć ź imi damovu;
- damova pavinna być źviazana z ekspartam abo impartam;
- valutu treba atrymać u terminy, praduhledžanyja hetaj damovaj.
Atrymanyja hrošy treba ŭnieści ŭ kasu arhanizacyi, pieradać inkasataram abo zdać u absłuhoŭvajučy biełaruski bank nie paźniej čym praz adzin pracoŭny dzień paśla ŭvozu valuty ŭ krainu.
Akramia pašyreńnia pieraliku apieracyj, praciahnuli i termin dziejańnia hetaj miery: kali raniej jana dziejničała da kanca 2025 hoda, to ciapier — da 31 śniežnia 2026 hoda.