Pa ŭłaśniku «Softkłuba» Sirotku, jaki siadzić u SIZA KDB, prylacieła i ad Polščy — na jaho kryptabiržu Bynex nakłali sankcyi

Rašeńnie ŭnieści «Jerpbieł» u nacyjanalny sankcyjny śpis Polščy było pryniata 30 kastryčnika 2025 hoda na padstavie lista kiraŭnika Ahienctva ŭnutranaj biaśpieki Polščy. 

Abhruntavańnie padajecca ćmiana, padkreślivajecca najaŭnaść niejkaha materyjału pad hryfam «sakretna». 

Publičnaja častka ž vyhladaje tak: 

«— «Jerpbieł» dziejničaje ŭ Parku vysokich technałohij, stvoranym pa dekrecie prezidenta Biełarusi. 

— PVT znachodzicca pad naŭprostavym kantrolem dziaržaŭnaha aparatu Biełarusi, adpaviedna, kampanii PVT zaležać ad uładaŭ (pryvodzicca prykład «Sinezisa» — kampanii, čyje kamiery raspaznavali tvary biełarusaŭ — NN). 

— U 2021 hodzie «Jerpbieł» ustanaviła supracoŭnictva ź Biełarusbankam, jaki znachodzicca pad mižnarodnymi sankcyjami, što było častkaj ličbavaj transfarmacyi banka i dało mahčymaść absłuhoŭvać fijatnyja valuty na kryptabiržy Bynex, uklučajučy apieracyi z VISA, dalarami i biełaruskimi rublami. 

— Dyrektaram kampanii ŭ 2022‑2023 hadach była Iryna Łysakoŭskaja, raniej — hałoŭny buchhałtar Biełarusbanka», — havorycca ŭ rašeńni.

Takim čynam, ukazvajecca, što dziejnaść «Jerpbieł» moža być vykarystana dla: 

— abychodu sankcyj;

— padtrymki orhanaŭ ułady Biełarusi;

— padtrymki ahresii Rasii suprać Ukrainy. 

Rašeńnie zamarožvaje ŭsie hrašovyja srodki i ekanamičnyja resursy kampanii ŭ Polščy, a taksama zabaraniaje pravodzić u jaje bok pramyja abo ŭskosnyja płaciažy i vykonvać lubyja dziejańni pa abychodzie hetych sankcyj. 

U kampanii jość 30 dzion, kab abskardzić rašeńnie, ale heta farmalnaść — jašče nivodnaj kampanii, jakaja trapiła pad nacyjanalnyja polskija sankcyi z-za vajny va Ukrainie, nie ŭdałosia paśpiachova asprečyć svajo ŭklučeńnie. 

Što ź siabie ŭjaŭlaje kampanija «Jerpbieł» i čym u realnaści jana mahła naklikać na siabie prablemy ŭ Jeŭropie?

«Jerpbieł» — heta kampanija-apieratar adnoj z centralnych biełaruskich kryptabirž Bynex, zasnavanaja ŭ 2019 hodzie. 

Bynex — heta raspracoŭka «Softkłuba». Ale kampanija nie ŭvachodzić u chołdynhi, viadzie asobnuju spravazdačnaść i nie naležyć «Softkłubu» naŭprost, zamiest hetaha ŭ bieniefiecyjarach «Jerpbieła» mieniedžary i supracoŭniki «Softkłuba» jak fizičnyja asoby.

Tak, naprykład, Uładzimiru Sirotku — fihurantu «spravy Softkłuba» — naležyć 23,78% doli «Jerpbieła». Stolki ž — namieśniku Sirotki pa technałohijach i jakaści ŭ «Softkłubie» Alehu Kiernohu. Inšym akcyjanieram (usiaho ich 14, bolšaść afilavanyja z «Softkłubam») naležać mienšyja doli.

Cikavaści situacyi dadaje toj fakt, što ŭ pole zroku biełaruskich apazicyjnych arhanizacyj, jakija zajmajucca rasśledavańniami i padajuć sankcyjnyja śpisy, «Jerpbieł» nie traplała — «Naša Niva» apytała takija arhanizacyi. A značyć, Polšča sama znajšła kampramietujučuju infarmacyju. 

Jak viadoma «Našaj Nivie», vialikaja častka supracoŭnikaŭ kampanii «Jerpbieł», u pryvatnaści — raspracoŭščykaŭ, — pracujuć z Polščy, kudy rełakavalisia pa palityčnych ci piersanalnych pryčynach. Mahčyma, insajdarskaja infarmacyja ab dziejnaści kampanii mahła trapić da palakaŭ ad kahości ź jaje supracoŭnikaŭ. 

Finasavyja pośpiechi Bynex paśla 2022 hoda sapraŭdy składana patłumačyć tolki rostam intaresaŭ da kryptavalut z boku biełaruskich fizičnych asobaŭ. 

Tak, u 2024‑m u paraŭnańni z davajennym 2021‑m abarot kryptabiržy vyras bolš čym na 2000%: u 2024‑m na biełaruskija rachunki «Jerpbieła» (spravazdača ab ruchu hrašovych srodkaŭ, artykuł 020) pastupiła 953 miljony biełaruskich rubloŭ. U 2021 było ŭsiaho 44 miljony rubloŭ. 

U toj ža čas viadoma, što zachodnija finansavyja i palityčnyja instytuty abvinavačvajuć Rasiju ŭ instrumientalizacyi kryptavalut dla abychodu sankcyj. Raniej pad sankcyi ZŠA trapiła rasijskaja kryptabirža Garantex i jaje pierajemniki Grinex, Exved i hetak dalej. 

Vypadak Bynex pieršy, kali pad sankcyi — pakul jašče tolki polskija — trapiła biełaruskaja kryptabirža. Pry hetym abvinavačvańnie ŭ dapamozie Rasii finansavać zakupki z dapamohaj kryptavalut nie ahučana naŭprost, a zavualavana pad doŭhim łahičnym łancužkom, pad jaki faktyčna možna padvieści lubuju kampaniju-rezidenta PVT. 

Jašče bolšaj admietnaści situacyi nadaje fakt, što ŭ jaje ŭłaśnikaŭ prablemy sa śpiecsłužbami adrazu ŭ dźviuch niepryjaznych pamiž saboj krainach: Biełarusi i Polščy. 

• 2
• 0
• 2
• 0
• 1
• 0
• 0
• 0