Katalikam Minska-Mahiloŭskaj dyjacezii dazvolili nie paścić 2 studzienia
Jašče adno śvieckaje śviata stała padstavaj dla admieny piatničnaha pasta ŭ Minska-Mahiloŭskaj archidyjacezii Ryma-Katalickaj carkvy. Raniej heta byli Dzień žančyn i Dzień Pieramohi, a ciapier — druhi dzień śviatkavańnia Novaha hoda, 2 studzienia, jaki źjaŭlajecca ŭ Biełarusi vychadnym dniom i prypadaje ŭ 2026 hodzie na piatnicu, piša Katolik.life.
Zdymak ilustracyjny. Fota: Brasłav Online
Dla chryścijan ustrymańnie ad spažyvańnia miasnych straŭ pa piatnicach — staražytnaja praktyka jak napamin pra raśpiaćcie Isusa Chrysta ŭ Vialikuju piatnicu. Zvyčajna piatničny post admianiajecca tady, kali piatnica prypadaje na ŭračystaści ci asablivyja śviatočnyja pieryjady pavodle liturhičnaha kalendara.
2 studzienia ŭ liturhičnym kalendary Katalickaj carkvy niama śviat i ŭračystaściaŭ.
Taksama dazvoł nie vykonvać post dadzieny sioleta i na piatnicu 26 śniežnia. Hetaja data źjaŭlajecca druhim dniom śviatkavańnia Božaha Naradžeńnia i ŭ Biełarusi sioleta jana taksama vychadny dzień.
Minska-Mahiloŭski arcybiskup, mitrapalit Juzaf Stanieŭski patłumačyŭ udzialeńnie dyśpiensacyi (vyzvaleńnia) ad abaviazku ŭstrymańnia ad užyvańnia miasnych straŭ «duchoŭnym spažytkam viernikaŭ».
Dyśpiensacyja ŭdzialajecca ŭsim katolikam Minska-Mahiloŭskaj archidyjacezii, a taksama ŭsim, chto ŭ hety dzień budzie znachodzicca na jaje terytoryi. Tym, chto budzie karystacca dyśpiensacyjaj, treba pračytać lubuju malitvu ŭ intencyi Papy.
Pra anałahičnyja rasparadžeńni kiraŭnikoŭ inšych dyjacezij Katalickaj carkvy ŭ Biełarusi, a taksama jepiskapaŭ pravasłaŭnaj carkvy, pakul nie paviedamlałasia.
Čytajcie taksama:
U Minska-Mahiloŭskaj dyjacezii dazvolili viernikam 9 maja nie trymać piatničny post
Katalicki arcybiskup aficyjna dazvoliŭ viernikam jeści miasa na śviata 8 sakavika
Arcybiskup Stanieŭski dazvoliŭ katolikam jeści miasa na Novy hod i pravasłaŭnaje Rastvo