Najhoršaja ŭ Jeŭropie. Biełaruś siarod aŭtsajdaraŭ u suśvietnym rejtynhu ŠI

Analityčny centr Oxford Insights apublikavaŭ śviežy dakład Government AI Readiness Index. Aŭtary acanili hatoŭnaść uradaŭ 195 krain ukaraniać i vykarystoŭvać ŠI ŭ dziaržaŭnych pracesach, ekanomicy i hramadstvie, piša Devby.io.

Krainy aceńvalisia pa 6 hrupach kryteryjaŭ:

• instytucyjnaja zdolnaść (policy capacity) — zdolnaść dziaržavy aktyŭna ŭpłyvać na toje, jak ŠI raźvivajecca i vykarystoŭvajecca ŭ krainie;
• kiravańnie i rehulavańnie (governance) — sistema miechanizmaŭ nahladu, jakija zabiaśpiečvajuć adkaznaje i biaśpiečnaje vykarystańnie ŠI, abaronu hramadskich intaresaŭ;
• infrastruktura dla ŠI (AI infrastructure) — techničnaja i ličbavaja baza, nieabchodnaja dla raźvićcia i ŭžyvańnia ŠI;
• ukaranieńnie ŠI u dziaržsiektary (public sector adoption) — nakolki efiektyŭna orhany vykarystoŭvajuć ŠI u svajoj pracy;
• raspracoŭka i raspaŭsiudžvańnie ŠI (development and diffusion) — padtrymka stvareńnia ŠI-technałohij i ich šyrokaha ŭkaranieńnia ŭ ekanomicy;
• ustojlivaść (resilience) — zdolnaść hramadstva i ekanomiki adaptavacca da nastupstvaŭ ukaranieńnia ŠI.

Biełaruś zaniała ŭ rejtynhu 121 miesca — pamiž afrykanskaj astraŭnoj dziaržavaj Kaba-Verde i Trynidadam i Tabaha, što ŭ Karybskim mory. Heta najhoršy vynik pa Jeŭropie, jakuju aŭtary dzielać na Zachodniuju i Uschodniuju. Ukraina, naprykład, uvajšła ŭ dziasiatku lidaraŭ pa Uschodniaj Jeŭropie.

Lidzirujuć u rejtynhu ZŠA. U topavuju trojku taksama ŭvajšli Vialikabrytanija i Francyja, dalej iduć Niderłandy, Hiermanija i Kitaj.

Poŭnuju viersiju dakłada z padrabiaznaj mietadałohijaj možna pahladzieć tut.

Kamientary da artykuła