Słuckija fiermiery pakazali hihancki apietytny kavałak sała — u tyktoku miljony prahladaŭ
Kaciaryna i Raman žyvuć u vioscy, što ŭ Słuckim rajonie, i razam z baćkami trymajuć haspadarku. Niadaŭna jany ŭrazili svaim sałam. «Heta Viapruk Odzina?» — u šoku ludzi ad pamieraŭ kavałka.
Skryn: prohar_myaso / TikTok
Kacia i Raman razvodziać śviniej, kurej i kačak. Hatovaje miasa jany pradajuć na kirmašy, a taksama dastaŭlajuć u Słuck i Salihorsk. Apošnija paŭtara hoda jany viaduć tyktok, dzie vykładvajuć videa z kaŭbasami, sałam i palandvicaj ułasnaj vytvorčaści.
Vyhladaje, što ciapier zamovaŭ u maładzionaŭ prybavicca, bo apošni ich rolik zalacieŭ bolš čym na 3,5 miljona prahladaŭ. Na videa Kaciaryna trymaje vielizarny kavałak sała daŭžynioj kala mietra, adrazaje ad jaho šmaty mienšaha pamieru i pakazvaje teksturu sała:
«Voś taki chatni miakki kavałačak sała. Miakka režacca, jak masła. Takoje sała niedzie ŭ piać maich palcaŭ».
Rolik nabraŭ niekalki tysiač kamientaroŭ. Nie ŭsie vierać u toje, što sała takich pamieraŭ sapraŭdy isnuje, i paprakajuć dziaŭčynu — maŭlaŭ, videa zhienieravanaje štučnym intelektam. Niekatoryja ŭpeŭnienyja, što sała takich pamieraŭ zvyčajna niasmačnaje i pa smaku padobnaje da myła, chacia nie ŭsie ź imi zhodnyja.
Skryn: prohar_myaso / TikTok
Ale ž dobrych słovaŭ bolej. U fiermieraŭ pytajucca, jakoj pavinna była być žyvioła, kab u vyniku atrymaŭsia taki hihancki šmat sała: mahčyma, heta byŭ mamant ci dynazaŭr? Raspytvajuć, jak možna zamović sała ad słučakoŭ sabie (fiermiery adpraŭlajuć jaho poštaj). I prosta žartujuć:
«Heta Viapruk Odzina? Jakoha ŭ Valchale štodzień padajuć pirujučym hierojam».
«Źnižka budzie na 80 kvadrataŭ?»
«Mianiaju na anałahičny pa pamierach dyvan».
Čytajcie taksama:
Biełaruś — adna z samych chałodnych krain u śviecie
«Apošniaja restajlinhavaja viersija ciubinhu». U Rečycy katalisia z horki… u trunie