Jaki dres-kod na aficyjnych pryjomach? Stylistka prakamientavała vobrazy biełarusaŭ na pryjomie ŭ prezidenta Polščy
Kaladny pryjom u prezidenta Polščy Karala Naŭrockaha ŭ varšaŭskim pałacy Bielvieder apynuŭsia sioleta ŭ centry ŭvahi. A jaki praviły dres-koda dla takich aficyjnych mierapryjemstvaŭ? Razabralisia ŭ ich i paprasili stylistku Hannu Pryšyvałka prakamientavać łuki haściej.
Kaladny pryjom u prezidenta Polščy Karala Naŭrockaha. Fota: Ofis Śviatłany Cichanoŭskaj
Isnuje niekalki vidaŭ dres-kodaŭ, jakija, akurat, adroźnivajucca ŭzroŭniem farmalnaści.
- White Tie (bieły halštuk) — samy strohi dres-kod, jaki praduhledžvaje frak, bieły miatlik i łakavany abutak dla mužčyn i viečarovyja maksi-sukienki, palčatki i ŭpryhožańni dla žančyn.
- Black Tie (čorny halštuk) — zvyčajna aktualny dla ŭračystych imprez, pryjomaŭ i premjer. Tut vitajucca smokinhi, čornyja miatliki i viečarovyja ci kaktejlnyja sukienki.
- Business Formal — patrabujecca dla aficyjnych pieramovaŭ, sustreč. Tut užo ŭ chod iduć kłasičnyja kaściumy ŭ niejtralnych kolerach i minimum aksesuaraŭ.
- Business Casual — mienš strohi, ofisny styl, u jakim žakiet možna nasić biez halštuka. Kašula, nahavicy ci spadnicy — ich u takim vypadku dastatkova.
Na sustrečy z prezidentam Polščy jak takoha dres-koda nie było, ale ŭ zaprašeńni ŭdakładniałasia, što vitajucca nacyjanalnyja kaściumy ci ich elemienty. Mienavita tamu na mierapryjemstvie možna było pabačyć ludziej jak u viečarovych sukienkach, tak i ŭ džynsach sa švedrami. Ale pradstaŭniki palityčnaha biełaruskaha koła pa tradycyi byli ŭ strohich kaściumach.
U jakaści nacyjanalnych detalaŭ u niekatorych haściej byli chustki z arnamientam, vyšyvanki.
Juryst i były palitviazień Maksim Znak byŭ u vyšyvancy. Fota: LookByMedia
Błohier Maksim Paršuta pakłaŭ u nahrudnuju kišeniu pinžaku chutsku z arnamientam. Fota: LookByMedia
Błohier Hleb Siamionaŭ abraŭ pinžak z vałoškami, a Ściapan Puciła — miatlik i chustku z arnamientam. Fota: kanał «Etot Prus»
«Palityki, deputaty, prezidenty, pieršyja łedzi, dypłamaty — dla hetych ludziej razumieńnie dres-kodaŭ — častka prafiesii. Jany apryjory musiać viedać praviły», — kamientuje Hanna Pryšyvałka. «A voś dla pradstaŭnikoŭ śfiery kultury, žurnalistaŭ, błohieraŭ i inšych dapuščalna nie raźbiracca ŭ tonkaściach, dastatkova razumieńnia «adekvatnaści» adzieńnia miescu. Siarod zaprošanych u prezidencki pałac Bielvieder takich haściej było niamała, tamu my i bačyli raznastajnaść vobrazaŭ. Chacia, viadoma, kali b u zaprašeńni prapisali praviły i patrabavańni da źniešniaha vyhladu, mahło b być inakš. «Mahło b», bo na pryjomie ŭ tym liku zavitali palitviaźni, i ja dumaju, što apieratyŭnaje nabyćcio viečarovych sukienak i darahich kaściumaŭ paśla turmy dla ich dakładna nie ŭ pryjarytecie».
Stylistka adznačaje, što choć sučasny śviet źmianiŭsia, i ŭ niečym patrabavańni da źniešniaha vyhladu zrabilisia bolš demakratyčnymi (naprykład, dla žančyn stała dapuščalnym być u bolš tonkich kałhotkach, čym u minułym), usio roŭna dres-kod — heta aktualnaja historyja.
«Pry dapamozie dres-koda ludzi dadatkova padkreślivajuć uzrovień, važnaść i tematyku toj ci inšaj imprezy. I, kaniečnie, kali b biełarusy zavitali da prezidenta Polščy z zanadta jarkim i mudrahielistym makijažam, z hłybokim dekalte i ŭ mini-spadnicach, to heta b pakazała ich niepavahu, bieskulturje. U takich vypadkach važna prosta adčuvać «adekvatnaść» adzieńnia padziei — hetaha moža być dastatkova, nieabaviazkova raźbiracca va ŭsich tonkaściach dres-koda», — dadaje stylistka.
Asobna surazmoŭca nadała ŭvahu dvum supraćlehłym vobrazam — nacyjanalnaj lidarki Śviatłany Cichanoŭskaj i pradstaŭnicy ABBA Maryny Hiryn.
«Maryna Hiryn dla mianie źjaŭlajecca prykładam dobraha hustu, pačućcia stylu i darečnaści, razumieńnia taho, što pasuje asabista joj. U jaje atrymałasia vytrymać bałans pamiž dziełavoj strymanaściu i ŭbranaściu. Tonka, ź vielizarnym hustam, i, hałoŭnaje, vielmi prahresiŭna, spałučajucca roznyja kolery. U dadzienym vypadku jaje vobraz całkam adpaviadaŭ uzroŭniu i tematycy imprezy, pary hoda, a taksama statusu samoj Maryny».
Maryna Hiryn — u tuflach i z sumačkaj u kolery fuksija. Fota: Ofis Śviatłany Cichanoŭskaj.
Što tyčycca Śviatłany Cichanoŭskaj, tut stylistka adznačyła, što jana jakraz mahła dazvolić sabie bolš śmiełyja rašeńni.
Śviatłana Cichanoŭskaja vystupaje na kaladnym pryjomie ŭ prezidenta Polščy Karala Naŭrockaha. Fota: Ofis Śviatłany Cichanoŭskaj
Fota: Ofis Śviatłany Cichanoŭskaj
«Da pradstaŭnikoŭ našaj palityčnaj apazicyi nikoli nielha pryčapicca nakont taho, što tyčycca parušeńniaŭ aficyjnaha, dziełavoha dres-koda. Možna tolki skazać, što časam ich vybar zanadta strymany i kansiervatyŭny (asabliva na kantraście ź inšymi zachodnimi palitykami). Ja mahu dapuścić, što heta robicca śpiecyjalna. Usie my pamiatajem, kolki šumu było, kali Śviatłana Cichanoŭskaja źjaviłasia ŭ videa z darahim kubkam. Jaje asensavany vybar — ścipłaść, kab złyja jazyki nie chacieli paabmiarkoŭvać, što tam kolki kaštavała, dastaŭšy kalkulatar».