Łuŭr značna pavysiŭ ceny dla naviedvalnikaŭ nie ź Jeŭrasajuza

Paryžski Łuvr pavysiŭ košt uvachodnych kvitkoŭ dla bolšaści naviedvalnikaŭ z krain pa-za miežami Jeŭrasajuza. Cana dla ich vyrasła davoli značna — z 22 da 32 jeŭra. Kiraŭnictva muzieja tłumačyć heta nieabchodnaściu ŭmacavać finansavaje stanovišča na fonie zabastovak, pierapoŭnienaści i inšych prablem, a taksama ŭ miežach ahulnanacyjanalnaj palityki dyfierencyjavanaha cenaŭtvareńnia, piša Euronews.

Uvachod u Łuŭr. Fota: AP Photo / Emma Da Silva

Novaja sistema praduhledžvaje, što bolš buduć płacić tyja, chto nie źjaŭlajecca hramadzianinam abo rezidentam ES, a taksama Isłandyi, Lichtenštejna i Narviehii. Dla arhanizavanych hrup z-za miežaŭ Jeŭropy košt składzie 28 jeŭra, pryčym kolkaść udzielnikaŭ ekskursij abmiažujuć da 20 čałaviek.

Francuzskija prafsajuzy rezka raskrytykavali hetaje rašeńnie, zajaviŭšy, što jano supiarečyć idei roŭnaha dostupu da kultury i pieratvaraje nacyjanalnuju spadčynu ŭ kamiercyjny pradukt. Častka turystaŭ taksama vykazała niezadavolenaść, choć inšyja pryznalisia, što ŭsio adno hatovyja płacić, bo Łuŭr zastajecca adnoj z hałoŭnych słavutaściaŭ Paryža.

Pry hetym niekatoryja katehoryi naviedvalnikaŭ, naprykład dzieci i padletki da 18 hadoŭ, pa-raniejšamu mohuć traplać u muziej biaspłatna.

Papiaredniaje padaražańnie kvitkoŭ u Łuŭry adbyłosia ŭ studzieni 2024 hoda.

Padobnaja sistema «dvajnych cen» uvodzicca i ŭ inšych znakavych miescach Francyi, u tym liku ŭ Viersalskim pałacy, Paryžskaj opiery i kapele-relikvaryi Sent-Šapiel. Ułady i administracyja abjektaŭ padkreślivajuć, što takaja praktyka ŭžo šyroka vykarystoŭvajecca ŭ śviecie.

Naprykład, u Vieniecyi turysty płaciać zbor za adnadzionnaje naviedvańnie horada, u Italii mnohija muziei biaspłatnyja dla miascovych žycharoŭ, a ŭ Kienii inšaziemcy značna bolš płaciać za safary. Anałahičnyja miery dziejničajuć u ZŠA, Indyi i Japonii, choć u apošniaj vypadki pavyšanych cen u restaranach dla inšaziemcaŭ vyklikali mocnuju krytyku.

Prychilniki dvuchuzroŭnievaha cenaŭtvareńnia śćviardžajuć, što jano dapamahaje źmienšyć nahruzku na infrastrukturu i zabiaśpiečyć bolš spraviadlivy dostup da kulturnych i pryrodnych kaštoŭnaściaŭ dla miascovych žycharoŭ. Krytyki ž ličać takuju praktyku dyskryminacyjnaj i niespraviadlivaj.

Kamientary da artykuła