U Kramli pačalisia pieramovy Pucina z pradstaŭnikami Trampa

Uviečary 22 studzienia ŭ Kramli pačalisia pieramovy pamiž Rasijaj i ZŠA pa pytańni zaviaršeńnia rasijska-ŭkrainskaj vajny, paviedamlaje TASS.

Uładzimir Pucin i Styŭ Uitkaf. Skrynšot ź videa

Z amierykanskaha boku ŭ sustrečy ŭdzielničajuć śpiecyjalny pasłańnik prezidenta ZŠA Styŭ Uitkaf, biznesmien i ziać Donalda Trampa Džared Kušnier, a taksama kamisar Fiederalnaj słužby zakupak Džoš Hrunbaŭm.

Z boku Rasii ŭ pieramovach udzielničajuć sam prezident Uładzimir Pucin, jahony pamočnik Juryj Ušakoŭ i śpiecyjalny pradstaŭnik prezidenta Rasii Kirył Dźmitryjeŭ.

Jak paviedamlaje TASS, akramia abmierkavańnia zakančeńnia vajny, baki płanujuć abmierkavać mahčymaść zaprašeńnia Rasii ŭ Radu miru, stvoranuju Trampam, i mahčymuju budučyniu častki rasijskich aktyvaŭ, jakija byli zamarožanyja ŭ ZŠA.

Pa vynikach sustrečy pamočnik Pucina Juryj Ušakoŭ praviadzie telefonny bryfinh dla žurnalistaŭ.

U hety ž samy dzień, 22 studzienia, prezident ZŠA Donald Tramp pravioŭ pieramovy z prezidentam Ukrainy Uładzimiram Zialenskim u Davosie. Sustreča doŭžyłasia kala hadziny. Paśla jaje Tramp adznačyŭ, što heta była «dobraja sustreča», i što «ŭsie chočuć, kab vajna skončyłasia». U Kijevie paviedamili, što Zialenski pravioŭ «praduktyŭnuju i źmiastoŭnuju» sustreču.

Paśla sustrečy Zialenski paviedamiŭ, što 23—24 studzienia ŭ Abu-Dabi płanujucca pieramovy z udziełam delehacyj Ukrainy, Rasii i ZŠA. Pavodle Financial Times, inicyjataram trochbakovaj sustrečy vystupajuć ZŠA, Ukraina padtrymała hetuju ideju, a Rasija pakul nie dała zhody. Viečaram 22 studzienia Zialenski adznačyŭ, što delehacyja Ukrainy ŭžo nakiravałasia ŭ AAE.

Kamientary da artykuła