Na svoj dzień naradžeńnia Zialenski z Naŭrockim, Naŭsiedam i Cichanoŭskaj u Vilni ŭšanuje pamiać Kastusia Kalinoŭskaha
Heta nie prosta pratakolny vizit, a simvaličny žest, jaki padkreślivaje adzinstva čatyroch nacyj i hatoŭnaść razam baranić svaju svabodu i niezaležnaść.
Hitanas Naŭsieda sustrakaje Uładzimira Zialenskaha ŭ Vilni, 25 studzienia 2026. Fota: AP Photo / Mindaugas Kulbis
25 studzienia, u niadzielu, Vilniu naviedajuć prezidenty Ukrainy Uładzimir Zialenski i Polščy Karal Naŭrocki. Razam z prezidentam Litvy Hitanasam Naŭsiedam jany voźmuć udzieł u pamiatnych mierapryjemstvach. Nahoda dla sustrečy na vyšejšym uzroŭni — hadavina Paŭstańnia 1863—1864 hadoŭ.
U cyrymonii maje ŭdzielničać i Śviatłana Cichanoŭskaja.
Heta nie prosta pratakolny vizit, a simvaličny žest, jaki padkreślivaje adzinstva čatyroch nacyj i hatoŭnaść razam baranić svaju svabodu i niezaležnaść. Asablivaść momantu nadaje toje, što 25 studzienia — dzień naradžeńnia Uładzimira Zialenskaha.
Uładzimiru Zialenskamu siońnia spoŭniłasia 48 hadoŭ.
Mienavita ŭ Vilni, na Łukišskaj płoščy, byli pakaranyja śmierciu lidary paŭstańnia, u tym liku biełaruski nacyjanalny hieroj Kastuś Kalinoŭski. U 2019 hodzie ich cudam, u vyniku apoŭźnia na hary Hiedymina, znojdzienyja pareštki byli ŭračysta pierapachavanyja ŭ kaplicy na mohiłkach Rosa.
U kaplicy, dzie spačyvajuć pareštki paŭstancaŭ. Fota: Naša Niva
24 studzienia ŭšanavańnie pamiaci paŭstancaŭ prajšło ŭ Varšavie. Vianki ŭskłali prezidenty Polščy i Litvy Karal Naŭrocki i Hitanas Naŭsieda. U cyrymonii ŭziali ŭdzieł taksama Śviatłana Cichanoŭskaja i Pavieł Łatuška.
Archiŭnaje fota: Śviatłana Cichanoŭskaja ŭskładaje vianok na mohiłkach Rosa. Fota: OSC
Imia Kastusia Kalinoŭskaha nosić połk biełaruskich dobraachvotnikaŭ va Ukrainie.