Cichanoŭskaja i Łatuška ŭ Varšavie ŭskłali vianki razam z Naŭrockim i Naŭsiedam
24 studzienia na zaprašeńnie kancylaryi prezidenta Polščy Karala Naŭrockaha biełaruskaja demakratyčnaja lidarka Śviatłana Cichanoŭskaja ŭziała ŭdzieł u cyrymonii ŭšanavańnia pamiaci ŭdzielnikaŭ paŭstańnia Kalinoŭskaha 1863—1864 hadoŭ. Mierapryjemstva adbyłosia ŭ Varšavie na terytoryi Varšaŭskaj cytadeli.
Cyrymonija prajšła z udziełam hanarovaj varty polskaha vojska. Padčas uračystaściaŭ z pramovami vystupili prezident Karal Naŭrocki i prezident Litvy Hitanas Naŭsieda. U svaich vystupach jany padkreślili, što baraćba za svabodu i niezaležnaść była ahulnaj spravaj čatyroch narodaŭ — palakaŭ, litoŭcaŭ, ukraincaŭ i biełarusaŭ. Prezident Polščy taksama pryvitaŭ prysutnych pradstaŭnikoŭ biełaruskich demakratyčnych siłaŭ.
Paśla pramoŭ adbyłasia cyrymonija ŭskładańnia kvietak i viankoŭ. U składzie biełaruskaj delehacyi vianok uskłali Śviatłana Cichanoŭskaja, namieśnik kiraŭnicy Abjadnanaha pierachodnaha kabinieta Pavieł Łatuška, śpikier Kaardynacyjnaj rady Arciom Bruchan, a taksama vieteran pałka imia Kastusia Kalinoŭskaha z pazyŭnym «Pčała».
«Svaboda nie dajecca nazaŭždy, jaje davodzicca abaraniać, znoŭ i znoŭ. Paŭstańnie Kalinoŭskaha nahadvaje, što ŭ nas jość hodnaść, jość hołas i jość prava žyć volna. My ŭšanoŭvajem pamiać paŭstancaŭ, bo hety dośvied supracivu i salidarnaści važny dla nas i siońnia, kali Biełaruś i Ukraina znoŭ zmahajucca za svabodu ad «ruskaha śvietu», — padkreśliła ŭ svaim vystupleńni Śviatłana Cichanoŭskaja.
Cichanoŭskaja voźmie ŭdzieł va ŭračystaściach z nahody hadaviny paŭstańnia 1863 hoda
Habryelus Łandśbierhis: Cichanoŭskaja nikoli nie adstupała, nikoli nie bajałasia
25 studzienia prezidenty źbiarucca ŭ Vilni ŭšanavać pamiać Kastusia Kalinoŭskaha
Premjer Litvy pra pierajezd Cichanoŭskaj u Polšču: Nie baču ni vyhady, ni straty
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj32
Kamientary