Daŭhaŭpiłskaja balnica ŭ Łatvii zvolniła 49 supracoŭnikaŭ z hramadzianstvam Biełarusi i Rasii
Siarod zvolnienych byŭ siaredni i małodšy miedycynski piersanał — 29 rabotnikaŭ, ź ich 11 piensijnaha ŭzrostu.
Balnica ŭ Daŭhaŭpiłsie, fota Google.maps
Spynieńnie pracoŭnych adnosin z rasijanami i biełarusami ŭ balnicy patłumačyli patrabavańniami zakona ab nacyjanalnaj biaśpiecy, jaki zabaraniaje hramadzianam Rasii i Biełarusi vałodać i kiravać abjektami krytyčnaj infrastruktury, zajmać pasady ŭ strukturach kiravańnia takich abjektaŭ, a taksama pracaŭładkoŭvacca abo akazvać pasłuhi na ich, piša «Nastojaŝieje vriemia» sa spasyłkaj na LETA.
Siarod zvolnienych byŭ siaredni i małodšy miedycynski piersanał — 29 rabotnikaŭ, ź ich 11 piensijnaha ŭzrostu. Astatnija 20 — supracoŭniki haspadarčaj słužby. U dačynieńni jašče da siami miedykaŭ balnicy pravodzicca paŭtornaja pravierka, zapyt nakiravany ŭ Słužbu dziaržaŭnaj biaśpieki Łatvii.
U Ministerstvie achovy zdaroŭja Łatvii na pytańnie pra toje, ci mohuć i ŭ inšych balnicach adbycca anałahičnyja zvalnieńni, paviedamili, što «patrabavańni zakona adnolkavyja dla ŭsich».