Na biełaruskich aŭtamahistralach pastaviać čyrvona-zialonuju łaziernuju sistemu apaviaščeńnia
U 2026 hodzie na biełaruskich aŭtamahistralach M1 i M4 płanujuć ukaranić łaziernuju sistemu śvietłavoha papiaredžańnia ź zialonymi i čyrvonymi sihnałami. Pra heta paviedamiŭ načalnik UUS Minskaha abłvykankama Andrej Lubimaŭ, padvodziačy vyniki raboty za 2025 hod, piša BiełTA.
Zdymak ilustracyjny. Fota z sacsietak
Pavodle słoŭ Andrej Lubimava, letaś na Minščynie była składanaja situacyja z darožna-transpartnymi zdareńniami: adbyłosia 741 DTZ, u jakim zahinuli 115 čałaviek, jašče 823 atrymali traŭmy roznaj ciažkaści. Zafiksavana bolš za 319 tysiač parušeńniaŭ praviłaŭ darožnaha ruchu, značnuju častku ź jakich učynili piešachody i ravarysty, u tym liku ŭ stanie ałkaholnaha apjanieńnia. Taksama było vyjaŭlena bolš za dźvie tysiačy niećviarozych kiroŭcaŭ, pa vinie jakich adbylisia dziasiatki avaryj z čałaviečymi achviarami.
Dla źnižeńnia avaryjnaści ŭ 2026 hodzie płanujecca praciah prafiłaktyčnaj i tłumačalnaj raboty, uzmacnieńnie kantrolu, u tym liku z vykarystańniem bieśpiłotnikaŭ. Dziaržaŭtainśpiekcyja Minskaj vobłaści zaćvierdziła niekalki padprahram, nakiravanych na pavyšeńnie biaśpieki ruchu. Jany praduhledžvajuć realizacyju sotniaŭ inžyniernych rašeńniaŭ: ustanoŭku darožnych aharodžaŭ, abstalavańnie piešachodnych pierachodaŭ aśviatleńniem, budaŭnictva kalcavych raźviazak i novych śviatłaforaŭ u niebiaśpiečnych miescach.
Akramia taho, pa inicyjatyvie DAI na trasach M1 (Brest — Minsk — miaža Rasii) i M4 (Minsk — Mahiloŭ) źjavicca łaziernaja sistema apaviaščeńnia, jakaja budzie pryciahvać uvahu kiroŭcaŭ i papiaredžvać avaryjnyja situacyi, u tym liku źviazanyja sa stomlenaściu i snom za rulom.
Čytajcie taksama:
U Breście pad kołami hruzavika zahinuła piensijanierka. Kiroŭca źjechaŭ ź miesca DTZ
U Barysaŭskim rajonie adbyłasia avaryja z udziełam rejsavaha aŭtobusa