80 tysiač žycharoŭ Biełharada zastalisia biez aciapleńnia paśla ŭdaru pa CEC
Vajna, raźviazanaja Kramlom, usio macniej adbivajecca na rasijskim pamiežžy.
Biełharad bieź śviatła. Fota: «Piepieł»
Krytyčnaja situacyja skłałasia ŭ rasijskim pamiežžy paśla načnych abstrełaŭ i maštabnych avaryj na kamunalnych sietkach. U Biełharadzie kala 80 tysiač čałaviek zastajucca bieź ciepłazabieśpiačeńnia ŭ lutaŭskija marazy. Hubiernatar vobłaści Viačasłaŭ Hładkoŭ paviedamiŭ, što akramia prablem z aciapleńniem, kala troch tysiač haradžan pazbaŭleny hazu, a jašče tysiača žycharoŭ znachodzicca biez elektryčnaści.
Kałaps pačaŭsia paśla rakietnaha ŭdaru, metaj jakoha stała CEC «Łuč». Heta vyklikała błekaŭt, jaki pieraros u sistemnuju avaryju: pry sprobach padklučyć sietki pačalisia šmatlikija razryvy trub i paŭtornyja karotkija zamykańni.
Niahledziačy na zajavy ŭładaŭ pra «hieraičnyja namahańni» enierhietykaŭ, aciapleńnie ŭ damy tak i nie viarnułasia. Kab vyratavać ludziej ad pieraachaładžeńnia, u horadzie razharnuli punkty abahrevu, u tym liku ŭ budynkach urada, fiłarmonii i miascovaj administracyi.
Adnačasova z hetym pad udar trapiła i Branskaja vobłaść. Pavodle zajavy hubiernatara Alaksandra Bahamaza, rehijon byŭ atakavany rakietami «Niaptun» i HIMARS. U vyniku abstrełu ŭ siami nasielenych punktach vobłaści całkam źnikła śviatło, paviedamlajecca taksama pra dvuch paciarpiełych mirnych žycharoŭ.