Alimpijada jašče tolki pačałasia, a zavajavanyja miedali ŭ niekatorych pryzioraŭ užo pałamalisia

Arhanizatary Alimpijskich hulniaŭ u Miłanie i Karcina d'Ampieca pačali pravierku paśla taho, jak vyśvietliłasia, što niekatoryja alimpijskija miedali paškodžvajucca. Pra heta jany zajavili, padkreśliŭšy, što nadajuć situacyi «maksimalnuju ŭvahu», piša Bi-bi-si.

Bryzi Džonsan pakazvaje miedal, jaki adarvaŭsia ad stužki. Fota: Andrew Milligan/PA Images via Getty Images

Dźvie załatyja pryziorki zbornaj ZŠA — harnałyžnica Bryzi Džonsan i fihurystka Alisa Lu — raskazali, što stužka adździaliłasia ad ichnich miedaloŭ amal adrazu paśla ŭznaharodžańnia.

Džonsan prademanstravała paškodžany miedal žurnalistam, patłumačyŭšy, što macavańnie, jakoje pavinna złučać stužku ź miedalom, prosta razvaliłasia. Lu apublikavała videa ŭ sacyjalnych sietkach, na jakim trymaje miedal i stužku asobna, pažartavaŭšy, što miedal moža abychodzicca i biez stužki.

Padobnaja situacyja zdaryłasia i ź niamieckaj kamandaj, jakaja zavajavała bronzu ŭ bijatłonie: na videa vidać, jak miedal adnaho sa spartsmienaŭ zvaliŭsia sa stužki padčas śviatkavańnia ŭ hateli.

Apieracyjny dyrektar hulniaŭ Andrea Frančyzi paviedamiŭ, što arhanizatary viedajuć pra prablemu i vyśviatlajuć jaje pryčyny. Jon padkreśliŭ, što momant uručeńnia miedala źjaŭlajecca adnym z samych važnych dla spartsmienaŭ, tamu jakaść uznaharod pavinna być biezdakornaj.

Pradstaŭnik Alimpijskaha i Paraalimpijskaha kamiteta ZŠA zajaviŭ «Bi-bi-si», što čakaje rašeńnia ad arhanizataraŭ. Pakul nieviadoma, ci atrymajuć spartsmieny novyja miedali zamiest paškodžanych.

Heta nie pieršy vypadak, kali ŭźnikajuć pytańni da jakaści alimpijskich uznaharod. Paśla Alimpijskich hulniaŭ u Paryžy 2024 hoda było padadziena kala 220 zapytaŭ na zamienu miedaloŭ z-za znosu i paškodžańniaŭ. Niekatoryja atlety, u pryvatnaści brytanskaja skakucha ŭ vadu Jaśmin Charpier, zaŭvažali, što miedali nieŭzabavie paśla ŭručeńnia pačynali ciamnieć. Arhanizatary Paryža-2024 tady paabiacali zamianić usie paškodžanyja ŭznaharody.

Kamientary da artykuła