Kiraŭnik Rheinmetall: Na hety momant my vyrablajem užo bolš bojeprypasaŭ, čym idzie va Ukrainu

Hienieralny dyrektar niamieckaha abaronnaha kancerna Rheinmetall Armin Papierhier miarkuje, što vajna va Ukrainie nie skončycca ŭ 2026 hodzie. Takoje mierkavańnie jon vykazaŭ 16 lutaha ŭ intervju bierlinskaj miedyjapłatformie Table Media, piša Deutsche Welle.

Armin Papierhier. Fota: AP Photo / Vadim Ghirda

Svaju pazicyju Papierhier arhumientavaŭ tym, što «Rasija nie zacikaŭlenaja ŭ zakančeńni vajny». U suviazi z hetym jon padkreśliŭ nieabchodnaść dalejšaj dapamohi Ukrainie, adznačyŭšy, što jaho pradpryjemstva hatovaje pastavić Kijevu dadatkovuju vajskovuju techniku.

«My možam dapamahčy ŭ mnohich halinach. Na hety momant my vyrablajem bolš bojeprypasaŭ, čym praduhledžana ŭ zaklučanych z Ukrainaj kantraktach», — paviedamiŭ Papierhier.

Jon dadaŭ, što ŭ niekatorych śfierach jašče nie zabiaśpiečana finansavańnie vytvorčaści dla USU. Pavodle słoŭ kiraŭnika Rheinmetall, kancern moh by pastavić Kijevu bolš harmat SPA, bojeprypasaŭ i navat bolš tankaŭ, a taksama bieśpiłotniki.

Jak vynikaje z dakłada Stakholmskaha mižnarodnaha instytuta daśledavańnia prablem miru (SIPRI), vyručka 100 najbujniejšych u śviecie abaronnych kampanij ad prodažaŭ uzbrajeńniaŭ i vajskovych pasłuh pa vynikach 2024 hoda vyrasła na 5,9%, dasiahnuŭšy rekordnych 679 miljardaŭ dołaraŭ (572 miljardaŭ jeŭra). Aŭtary tłumačać heta ŭ tym liku vajnoj Rasii suprać Ukrainy, jakaja praciahvajecca.

Vytvorcy zbroi z Hiermanii ŭ 2024 hodzie prademanstravali adzin z samych značnych pakazčykaŭ pa roście vyručki — na 36%. Chutčej hety pakazčyk vyras tolki ŭ Japonii — na 40%. Čatyry niamieckija kampanii ŭvajšli ŭ suśvietny top-100, pryčym lidaram staŭ mienavita Rheinmetall. Z vyručkaj ad vajskovych prodažaŭ 8,2 miljarda jeŭra (plus 47% za hod) jon zaniaŭ 20‑ie miesca ŭ ahulnym śpisie.

Kamientary da artykuła