Homielskija ŭłady i «Ruski dom» pasvarylisia praź ściah SSSR
U pačatku lutaha kiraŭnik «Ruskaha doma ŭ Homieli» Alaksandr Maržuchin abvinavaciŭ miascovyja ŭłady ŭ niekanstruktyŭnym staŭleńni da dziejnaści arhanizacyi, adnak sutnaść kanfliktu zastavałasia nieviadomaj. Vydańnie «Fłahštok» vyśvietliła, što prablema ŭ ściahu SSSR.
Saviecki ściah na fasadzie «Ruskaha doma ŭ Homieli». Fota: t.me/russiangomel
Jak daviedaŭsia «Fłahštok», «ciorki» pamiž uładami horada i Maržuchinym uźnikli praz vyviešany na budynku «Ruskaha doma» ściah Savieckaha Sajuza. Heta nie spadabałasia čynoŭnikam, jakija, vierahodna, chacieli b sami kantralavać vykarystańnie hetaj simvoliki. Jak praviła, ułady Biełarusi vykarystoŭvajuć jaje tolki ŭ kantekście Druhoj suśvietnaj vajny.
Maržuchin u 2025 hodzie atrymlivaŭ padziaku ad Homielskaha harsavieta. Fota: «Homielskije viedomosti»
Jak paviedamlaŭ «Fłahštok», ściah SSSR byŭ vyviešany nad uvachodam u budynak «Ruskaha doma» pobač z rasijskim ściaham jašče ŭ kastryčniku 2025 hoda. Heta była inicyjatyva «Histaryčnaha kłuba» pry «Ruskim domie», jaki viadzie adyjozny prapahandyst stalinizmu i «ruskaha śvietu» Arciom Sakoŭski.
Aficyjna «Rassupracoŭnictva» tłumačyła źjaŭleńnie ściaha tak:
«U našym histaryčnym kłubie adbyłasia važnaja padzieja: ściah SSSR — toj samy, pad jakim našy dziady išli ŭ boj, — ciapier horda łunaje na našym budynku. Heta simvał dobleści, stojkaści i Vialikaj Pieramohi, jaki ciapier bačyć uvieś horad. Jon budzie natchniać nas na novyja daśledavańni, dyskusii i spravy, hodnyja pamiaci našych hierojaŭ, kožny dzień nahadvajučy pra našu vialikuju historyju».
Ale paśla kanfliktu z haradskimi ŭładami ściah Savieckaha Sajuza prybrali z budynka «Ruskaha doma».
Čytajcie taksama:
U Homieli adkryłasia vystava, pryśviečanaja «hierojam SVA»
U Homieli «Ruski dom» pad maŭčańnie ideołahaŭ masava razdaje hieorhijeŭskija stužki