Chakiery z Kitaja atakavali spadarožniki ZŠA

Kitajskija chakiery arhanizavali kibierataki na dva ŭradavych spadarožniki ZŠA ŭ 2007 i 2008 hadach. Chakiery prakralisia ŭ sistemu kiravańnia spadarožnikami Landsat 7 i Terra (EOS AM-1) na naziemnaj stancyi, havorycca ŭ dakładzie, padrychtavanym dla Kanhresa ZŠA.

«Dostup da kantrolu za spadarožnikam davaŭ chakieram mahčymaść paškodzić abo źniščyć spadarožnik. Jany taksama mahli zabaranić, padrabić, panizić jakaść sihnału spadarožnika abo ažyćciavić lubyja inšyja manipulacyi», — cytuje dakład Guardian.

U kastryčniku 2007 spadarožnik Landsat 7 padvierhnuŭsia napadu na 12 chvilin, a ŭ červieni 2008-ha na dźvie chviliny vyjšaŭ z-pad kantrolu spadarožnik Terra. Praź miesiac, u lipieni 2008, novaj atacy padvierhnuŭsia Landsat 7 — chakiery znoŭ kantralavali jaho 12 chvilin. U kastryčniku 2008-ha znoŭ byŭ atakavany spadarožnik Terra, užo na dzieviać chvilin.

U dakładzie, jaki razhledzić kamisija pa ekanomicy i biaśpiecy ŭ ZŠA i Kitai, pryvodziacca dadzienyja amierykanskich vajenna-pavietranych sił. Zhodna ź ich rasśledavańniem, kitajski ŭrad moh spansavać chakierskija ataki, sprabujučy takim čynam vyśvietlić, nakolki ŭraźlivyja sistemy kiravańnia spadarožnikami ZŠA. Tym nie mienš, u dakładzie nie śćviardžajecca, što ŭrad Kitaja mieŭ da ich niepasrednaje dačynieńnie.

Napady pravodzilisia praz kamiercyjnuju spadarožnikavuju stancyju, raźmieščanuju na narviežskim Špicbierhienie. Heta tolki adna z čatyroch stancyj, z dapamohaj jakoj ažyćciaŭlajecca kantrol za Landsat 7, astatnija try raźmieščanyja na terytoryi ZŠA. NASA vykarystoŭvaje stancyju na Špicbierhienie dla pieradačy dadzienych. Inšych padrabiaznaściaŭ ataki ŭ dakładzie nie pryvodzicca.

Zhodna z daviednikam pa Landsat 7, naziemny apieracyjny centr moža pasyłać dadzienyja ab źmienie arbity i raznastajnych manieŭrach. Heta aznačaje, što chakiery mahli dasłać na spadarožnik pamyłkovyja dadzienyja, jakija pryviali b da niekantralavanaha ruchu. U vyniku spadarožnik moh zhareć, a jaho abłomki mahli zvalicca ŭ niepradkazalnych rajonach Ziamli.

Kitajski ŭrad nie ŭpieršyniu abvinavačvajecca ŭ chakierskich napadach, skiravanych suprać zachodnich kampanij i infrastruktury, hetak ža jak i ŭ kibieratakach na dysidentaŭ i apazicyju.

Tym nie mienš u červieni vajskoŭcy Kitaja abviaścili eru «internet-vojnaŭ», zajaviŭšy, što kibierataki i supraćstajańnie ŭ siecivie prychodziać na źmienu jadziernamu strymlivańniu.

«U toj čas jak jadziernaja vajna była stratehijaj industryjalnaha hramadstva, internet-vajna robicca praduktam infarmacyjnaha hramadstva», — havaryłasia ŭ artykule vykładčykaŭ Kitajskaj akademii vajennych navuk.

Prahramnaja zajava pradstaŭnikoŭ armii Kitaja źjaviłasia praź niekalki dzion paśla paviedamleńnia ŭ Wall Street Journal pra śpiecyjalnuju stratehiju Pientahona, jakaja praduhledžvaje adkaz vajennaj siłaj na chakierskija ataki z-za miažy.

Kamientary da artykuła