U Lelčyckim rajonie buksiravany aŭtamabil urezaŭsia ŭ voz

U DTZ na trasie pad Lelčycami traŭmy atrymała 49-hadovaja pasažyrka voza, u jaki ŭrezalisia «Žyhuli» na trosie.

Avaryja adbyłasia 14 listapada kala pałovy siomaj viečara na aŭtadarozie Mazyr — Lelčycy — Miłaševičy — miaža Ukrainy, paviedamili ŭ pres-słužbie UDAI UUS Homielskaha abłvykankama. Kiroŭca aŭtamabila VAZ-21061 buksiravaŭ VAZ-2101. Na 71-m kiłamietry hetaj darohi jon niapravilna vybraŭ chutkaść ruchu, u vyniku čaho kiroŭca buksiravanaha aŭto nie spraviŭsia z kiravańniem i ŭčyniŭ najezd na voz, jaki jechaŭ napieradzie ŭ spadarožnym kirunku.

U avaryi 49-hadovaja žančyna, što jechała na vozie, atrymała pierałom taza i była dastaŭlenaja ŭ balnicu. Kiroŭcy aŭtamabilaŭ uciakli ź miesca zdareńnia, ale supracoŭniki Dziaržaŭtainśpiekcyi zdoleli vyśvietlić ich asoby i zatrymać.

Kamientary da artykuła