Barodzič-Smalinski: Suvierenitet Biełarusi pastupova razmyvajecca

19.12.2011 / 12:37

Jak bačać rasijska-biełaruskija intehracyjnyja pracesy zamiežnyja palitołahi?

Navina pra stvareńnie ŭ pierśpiektyvie na postsavieckaj prastory novaha Jeŭrazijskaha ekanamičnaha sajuza ŭ Biełarusi ŭspryniali pa-roznamu. Pradstaŭniki ŭłady družna zajavili ab pahłybleńni intehracyjnych pracesaŭ, niezaležnyja palitołahi — pra pahrozu suvierenitetu i biełaruskaj dziaržaŭnaści. Svaim mierkavańniem što da pierśpiektyvaŭ stvareńnia Jeŭrazijskaha ekanamičnaha sajuza i nastupstvy dadzienaha pracesu dla Biełarusi, «Štodziońnik» paprasiŭ padzialicca siabra praŭleńnia varšaŭskaha Centra mižnarodnych daśledavańniaŭ Vojciecha Barodzič-Smalinskaha.

— Intehracyjny praces na Uschodzie pačaŭsia adrazu ž paśla taho, jak raspaŭsia Saviecki Sajuz. Ideja hetaha pracesu — stvaryć niešta padobnaje da Jeŭrasajuza.

Roźnica tolki ŭ tym, što ŭ Jeŭrasajuzie ŭsie hetyja pracesy pačynajucca źnizu. A na Uschodzie — źvierchu.

I nie źvierchu ŭsich dziaržavaŭ, a źvierchu adnoj, jakaja maje samy vialiki patencyjał, samuju vialikuju kolkaść nasielnictva, samy vialiki biudžet. Jakaja padtrymlivaje ŭsie astatnija dziaržavy. U ES takoha niama. Možna, viadoma, kazać, što ŭ Jeŭrasajuzie jość Hiermanija, Francyja. Heta, viadoma, upłyvovyja dziaržavy. Ale ŭ ES jość miechanizmy, jakija dazvalajuć kantralavać hetyja krainy, jość miechanizmy ŭzhadnieńnia. I jany pracujuć. Usie damovy, dyrektyvy, rasparadžeńni dziejničajuć. A va ŭschodniaj intehracyi z padpisanych dakumientaŭ pracujuć 10–15%. I heta taksama pakazčyk realnaści intehracyi.

Ciapier pačynajecca novaja intehracyjnaja kampanija ŭ Rasii, i my byli śviedkami biesprecedentnaha abmienu dumkami pamiž Uładzimiram Pucinym i Alaksandram Łukašenkam. Abodva jany kazali pra budučyniu, ale, jak na mianie, kožny dumaŭ pra roznyja rečy. Uładzimir Pucin pačaŭ svaju vybarčuju kampaniju ź idei, što treba ŭzmacniać intehracyju.

Padstavy dla hetaha tyja ž, što i ŭ ES. Siarod ich i hłabalizacyja, i kitajskaja ekanamičnaja pahroza i toje, što kraina nie moža žyć bieź ciesnych kaapieracyjnych suviaziaŭ. Ale pačatak vybarčaj kampanii ź intehracyjnych płanaŭ aznačaje, što Uładzimir Pucin biare na siabie abaviazańnie, pryjšoŭšy da ŭłady, za 12 hadoŭ pakinuć niejkaje novaje ŭtvareńnie. Ja nie dumaju, što hetaja ideja źviazanaja z zadačaj vyjhrać vybary. Jon ich vyjhraje i tak. Dumaju, što Pucin prosta choča ŭpisać siabie ŭ historyju jak asobu, jakaja zmahła abjadnać krainy ŭ sajuz.

Ale hety praces vyklikaje pytańni.

Pa-pieršaje, tamu što ŭ ES nichto nie dumaje, što Jeŭrazijski ekanamičny sajuz — heta surjoznaja inicyjatyva. Pa-druhoje, vielmi mała ludziej razumieje, jak heta adabjecca na budučyni. I, pa-treciaje, nichto nie viedaje, jak paśla takoha abjadnańnia razmaŭlać z Rasijaj.

A nakont pahrozy biełaruskamu suvierenitetu… Ci maje jaho Biełaruś?

Viadoma, vizualna jon jość. Ale jašče zusim niadaŭna ŭ Biełarusi ŭsie kazali, što kraina nie pačnie pradavać svajo familnaje srebra. Nichto nie vieryŭ u prodaž «Biełtranshazu». A što ciapier?

Kvatery ŭ Minsku aktyŭna skuplajuć rasijcy. Što heta aznačaje? Viadoma, dla ich Biełaruś — heta kraina, jakaja bližejšaja da ES. U joj paradku bolš, administracyja pracuje lepš i karupcyi mienš. Heta fakt. Ale heta taksama aznačaje, što pavialičvajecca kolkaść rasijcaŭ, jakija ŭpeŭnienyja, što im usio roŭna — Rasija abo Biełaruś. Heta praces. Jon zojmie nie hod i nie dva. Jon raściahniecca na 10–15 hadoŭ.

A praz 20 hadoŭ možna pračnucca ŭ inšaj realnaści. Vybačajcie, što ja tak sumna. Ale takija tendencyi.

Čytajcie taksama:

Kamientary da artykuła